Myanmar buaina leh Mizoram

Myanmar rama sorkar sipaite leh mipui sipai (People's Defence Force) te inkap tur thuthang avangin Myanmar lama mi eng emaw zat chu tun hnai khan Mizoramah an rawn lut a, inkahna a thlen zui avangin raltlan hi an pun zel a rinawm.

Myanmar ram tualchhung buainain India rama a nghawng nat ber state chu Mizoram hi a nih a rinawm a, kan unaute an nih miau avangin kan lo tuam hlawm ngei tur a ni. He tualchhung buaina hi a tawp hun tur hriat a ni lo a, a zual zel a nih phei chuan Mizoram sorkar tan buaipui chhunzawm zel a ṭul dâwn a ni.

He buaina nghawng hi a na em em a, a tawp hun tur rin thiam a harsat avang hian Mizoram hian raltlan hi hun rei zawk a la mikhual dâwn tih a chiang a, châm hlen duh zawk pawh an awm ngei ang. He buaina thleng mêk hi Mizoram sorkar tan tihtawp theih a ni lo a, international politics a nih tawh avangin India pawh a inrawlh a remchang vak dawn lo a, kan unaute zingah raltlan an awm chuan kan theih anga lo buaipui hi kan tih theih awm chhun a nih hmel.

Ram hranga awm Zofaten harsatna an tawh mêk lai hian 'refugee' anga dawnsawn chungchangah India sorkar chu a che ṭha duh meuh lo a, India hian kan unaute hi a dawngsawng ṭha duh lo a nih pawhin Mizorama Mizote hian kan theihna sang bera kan lo buaipui zel hi a ṭul ang.