Ration card dik lo sawifiahna kha

Food, Civil Supply & Con-sumer Affairs (FCSCA) minister chuan ration card siam thar dik loh chhan a sawifiah a, April thla chhung ngeiin siamṭhat kan tum, thu a sawi.

Minister sawi danin ration card-a chhungkaw hming ziah luhna tur sem turin kan pe a, ṭhenkhatin an sem lo a, a siam hun laia ngaihsak lo an awm bawk. Hming ziah luhna tur an semah pian ni, thla leh kum dik ziah lan a nih loh chuan an software hmanah a dik thei lo a, hei vang hian January 1-a piang anga ziah tam tak a awm phah.

Minister sawi-fiahna hi a pawmawm a, software an hman avangin form fill up dan a dik loh miau chuan computer chuan a hmu dik lo ngei dawn a ni. Computer-in a tidik lo tih hi chu hai rual a ni lo a; nimahsela computer hi mihring khawih a ni a, a dik lo ang anga dah luttu pawh mihring an ni a, heti zat tidik lo chunga an sem chhuak hi chu sawi mam chi a ni lo.

Mizoram chief minister zahawm tak pawh sorkar hna-thawk anga an dah a nih chuan an en miah lo niin a puh loh theih loh a, khawilaiah emaw software-in a hmuh dan ang anga a dik loa in print chhuak chu lo awm ve thei bawk mah se, a khua leh veng anga a dik lo deuh vek maite hi chu computer lama dah luttute mawhphurhna a ni chiang a ni.

Sorkar tan chuan siam ṭhat leh hi thil theih a ni a, thil harsa tak ni pawhin a lang lo a; nimahsela an tih dik loh sawi mam zawng emaw, hnathawktute chhan tur zawnga computer software lam mawhpuh vek ringawt hi chu a fuh lo ang.

Ration card dik loah hian, "Kan tihsual a ni a, a tisualtute chungah a ṭul angin hma kan la ang," tih bak insawithiamna hi chu mipuiin an pawm theiin a rinawm lo.