Inthlan zawh boruak

Mizoram inthlanpui atana vote thlak chu tluang taka zawh a ni ta a, vote tla pawh a ṭha thawkhat hle. Inthlannaa vote tlate hi December 3-a chhiar tura ruahman a ni a, political party hrang hrangte leh mipui nawlpui pawhin chak tur an inrinsiak hunlai a ni.

Inthlanah hi chuan chak an awm a, chak lo an awm ṭhin a, chumi hresâ chuan candidate-te pawhin inthlan hi an chuh hlawm a. Hetihlai hian political party worker zingah lo ṭang ulh bikte leh lo la na zual an awm ṭhin a, thil ṭha lo zawkte pawh a thlen phah tawh ṭhin.

Inthlanah hi chuan political party lam hi mahni mi leh sate thu leh hla deuh chauh ngaithla ṭhin, an thu leh hla dawnsawn pawh mahni lam thu hlir a nih avangin chak tura inring an ni deuh vek a. A tawpah chuan bial pakhatah mi pakhat zel bâk an tlin dâwn loh avangin inring sual fe fe pawh an awm ngei ang.

Hei vang tak hian party tinte pawh kan inzirtir ṭhat a pawimawh em em a, chak dan thiam tur leh chak loh pawha pawm thiam tura inzirtir hunlai tak a ni. Tling tura inring tak tling leh si lote hi an na ṭhin a, an duh loh thilte an tih phah hial ṭhin a; chutiang bawkin tlin dan thiam loa uchuak taka che ṭhinte pawhin ṭul loah buaina an chawk chhuak thei.

Vote kan thlak zo ta a, vote chhiar hma hun thawl ṭha kan neih hi thiam takin hmang ila, tling tura kan inbeisei rual hian tlin loh palha pawm thiam tura kan inrin rûk a pawimawh takzet a ni.