Myanmar, India leh Mizoram

Tun hnaiah Myanmar ram chhungah Myanmar sipaite leh mipui sipai (PDF) te inbeihna avangin Myanmar sipaite chu Mizoramah an rawn tlanchhia a, Zokhawthar police station-a an inpek hnuah India sorkar ruahman angin hmun himah suan chhuah an ni tawh.

Myanmar tualchhung inbeihna avang hian Mizoramah raltlan tam tak an awm tawh a, tun hnaia inbeihna chhuak thar avang hian raltlan hi an pun belh zel. Raltlan hmasa zinga ṭhenkhat chu Mizorama inben bel an tum hial tawh a, tun hnaia rawn lutte pawh hi an kir leh hun tur sawi theih a ni lo.

Myanmar sipai rawn tlanchhiate hi Myanmar leh India rama Mizote thinlungah chuan mipuiin manin an phu tawka hrem ngei kan duh tlang ang a, mi tam tak chuan Zofate nunna latute an nih bawk avangin an nunna lak ve hial an duh ang. Nimahsela ram pahnih sorkar inkara indawrna thil a ni tawh a, Mizoram chhungah sahimna an rawn zawng a, chuta ṭang chuan India sorkar ruahmanna angin hmun him zawkah suan chhuah an ni ta.

International politics hrethiam lo leh man phak lo mipui nawlpui tan chuan he thil thleng hi a hrilhhaithlak a; kan Zohnahthlak unaute ngei kàp a, mipui sipaite (PDF) mai ni lo; mipuite pawh kutthlak duhtu Myanmar sipaite hi Mizoram an lo luh chuan lo man a, an phu tawka hrem ngei kan duh tlang. Hetihlai hian India sorkar leh Myanmar sorkar inṭhian ṭhatna zarzoin him takin an awm ta zawk niin a lang.

Tun hnaia Mizoram leh Myanmar ramria thil thleng hian ngaihtuah a tithui a, British sorkarin ramri a rin tàk avanga ram pahniha awm ta Zofate inkarah pawh international politics-in ro a rel tak miau avangin, Zofate duh ang diak diakin rorelna kalpui theih a ni lo tih a takin kan hmu mek a ni.