Pawisa leh tourism project

Ministry of Tourism hnuaia Swadesh Darshan 2.0 Scheme kaltlanga Champhai district-a tourism lama hmalak dan tur chu tun hnai khan Champhai Bawrhsap hoin sorkar mi pawimawh leh pawl hrang hrang hruaituten an sawiho a; sorkar laipui sum cheng nuai 9,000 hmangin Tlangsam, Zotlang, Keilungliah, Vangchhia, Farkawn leh Dungtlangah hmalak tum a niin, Swadesh Darshan 2.0 Scheme hnuaia kalpui tur a ni.

Sorkar laipui hian tourism tihhmasawnna turin ruahmanna lian tak tak a nei a, Mizoram tana kan hai chhuah thiam chuan tun aia sum tam zawk pawh hai chhuah tur a awm ngei ang.

Swadesh Darshan hnuaia Integrated Development of New Eco Tourism-ah Thenzawl leh South Zote leh Reiek hmunah cheng vaibelchhe 92.25 pek chhuah a ni tawh a, Thenzawlah golf course ṭha tak siam a ni chungin state pawn leh ram pawn aṭanga tlawh erawh a hlawh tawk lo. Tun hnaia journalist rualin an tlawh ṭuma an hmuh chhuah chu a sum lakluh aiin a enkawlna sensoa kal a tam zawk a, ram pawn aṭanga golf khel tura tlawhtu mi pakhat chiah a la awm a, a tlawhtu hi Mizoram chhunga mi deuh vek an ni.

Sakawrhmuituai tlanga skywalk siamna tur leh Durtlang leh Chaltlang inkara ropeway siam tumna chu a hlawhtling lo a, a sum senso leh an thawh chin a inmil lo a, chutihlaiin thil awm dan dik tak chhui chhuah loa awmin mipui tan pawh a hrilhhaithlak hle a ni.

Mizoramah hian project lian zuih ral ta hi a tam tawh hle mai a, mi tihsual tawh hi inzirna atana hmangin Champhai district-a sorkar laipui sum hmanga tourism project lian tak awm hi hlawhtling ngei tura kalpui ni se, a nghawng tur khawtlang mipuiah inzirtirna ṭha taka kalpui ni thung se, Mizoram rohlu siam ngei tum tawh rawh se.