Sorkar sum phurrit

Mizoram sorkar chuan sorkar kum kal mek 2023-24 chhungin hmun hrang hrang aṭangin cheng nuai 1,08,913.60 a puk tawh. RTI Act tlawhchhana a zawhna Finance department-in a chhan danin, Mizoram sorkar hian financial year 2023-24 chhungin hmun li aṭangin sum a pûk tawh a, sum a pûk tamna ber chu open market borrowing (OMB) hmangin a ni a, OBM hmangin cheng nuai 51,000 a pûk tawh a; Special Assistance to States for Capital Investment (SASCI) hnuaiah cheng nuai 48,754.97 a pûk tawh bawk.

Sorkar term pum pawh ni lo, kum khat chhunga heti zat zet mai kan sorkarin sum a pûk dan en hian, kan state sum dinhmun a chhe hle tih thup rual a ni lo. Tu pawh lo sorkar se, a hna hmasa ber tur chu sum dinhmun chingfel leh inrenchem taka kal a ni ngei ang.

Sorkar laipui lamin an phal chin piah lamah pawn lam aṭanga a pûk theih theih kan dap hi engtikah emaw chuan kan rulh leh tur a ni a, kan term chhunga kan rul lo a nih pawhin Mizo mipuite suma rulh leh tur a nih hi kan ngaihtuah a ngai. Tun hnaia kan sorkarin a hmachhuan em em, political party inkhawma inthlan campaign pawisa anga hman tura an sawi chhuah hial chu SASCI sum hi a ni a, hei hi a thlawna dawn a ni lo a, a pung awm lo mah se; Mizo mipui sum aṭanga rulh leh tur a ni.

November 7-ah khan kum nga awm leh tura sorkarna vawn fing chelhtu tur Mizoram mipuiin kan thlang fel tawh a, kan thlan chhuah chu tute pawh ni se, tun aia sum leh pai enkawl dana fir zawk kan mamawh tawh a. Sorkar tharah tute pawh lo tling se, kan ram sum dinhmun hi siam ṭhat a ṭul takzet a ni.