Inkalpawhna ṭha

Bungraw phur chi rel lian chuan tun hnai khan Bairabi a lo theng a, Transport minister hoin sorkar mi pawimawhte'n an lo hmuak a; rêl lian hian wagon 40-ah buhfai metric ton 2,600 a rawn phur thleng a ni.

Rel lianin Mizoram a rawn luh theih takah chuan nitin mamawh phurh luh a awlsam phah sawt dawn a, kawng tam takah ramin a chhawr dawn a ni. Mizorama bungraw lut tam zawk hi lirtheia phurh luh a nih vang hian a phurh man a sang a, hei vang hian India rama thil man tona hmun a nih phah a, rel lian hmangin man tlawm zawkin bungrua a phurh theih tawh dawn a, hei hian thil man thlengin a ṭha zawngin nghawng thei se a duhawm khawp mai.

Mizoramin airport a neih chhun pawh hi a tirah sawi neuh neuh awm mah se a ṭangkaizia kan zavaia hriat a ni a, mi hausatte tan chauh a lo ni bik hauh lo a, damlote leh thil pawimawha zin chhuak duhte tan hlei hlei a ṭangkai. Ram chhunga helicopter service pawh hian mipui tan awlsamna nasa takin a thlen a, ṭul bik thilah phei chuan a ṭangkai lehzual a ni. Tunah hian state sorkar bakah sorkar laipui lam ruahmannain Mizoram chhungah kawngpui eng emaw zat sial a ni a, heng kawngpuite hi a siam hmangah duhthu sam chiah lo mah se, lirthei kal theiha laih tlang a nih hi chuan a chhawrtu chu mipuite kan ni.

Mizoram chhunga rel kawng a luh thuk zawk theihna turin tunah hian hna thawh mek a ni a, hei hian Mizoramah thil tam tak a thlak dawn a, hmasawnna pawh a thlen ngei ang. Heng thil lawm-awm tak phêna thil ngaimawhawm lo awm ṭhin chu zangnadawmna teltute hming en hian a ni. Milian leh thil hre zawkte ram tan tlang tura rel kawng a kal tam lutuk hian ngaih a tiṭha lo a, tute emaw ram lei chhawnga rel kalna tur tih hre lawka thil tih a ang ṭhin.

Inkalpawhna ṭha hi ram hmasawnna atan a ṭangkai a, Mizorama rel lian chi lo lut pawh hi mipuiin an chhawr ngei a beiseiawm.