NIT buaina enfiah a ngai

National Institute of Techno-logy (NIT), Mizoram boys hostel-ah tun hnaiah buaina a chhuak a, driver pahnih bân an ni. Buaina thleng chungchang hi Ministry of Home Affairs chuan NIT, Mizoram hotute a rawn zawtfiah a; NIT director chuan thuchhuah siamin he buaina hi chinfel a nih tawh thu a puang.

NIT Mizoram Boys Hostel-I lama thil thleng hi zirna inah chuan thil thleng ve fo a ni a, buaina chhuah dan chu eng pawh lo ni se, a thawm hi a mawi lo hle a ni. He hostel-a awm ve hnam dang ṭhenkhatin Prime Minister office thleng thlenga an lo zualko hi thil fuh lo a ni a, hostel pakhata buaina ni ve mai an tlang thantir dan hi a fel lo hle a ni.

Zirna inah chuan buaina tenau hi a chhuak fo a, hnam leh hnam han intihbuai changte pawh awm mah se, hetiang hi chu thil thleng ve fo ṭhin a ni. Mizoram chhunga zirna in sanga thil thleng, hnam dangin Mizote hekna remchang ang maia an hmang hi chu a fuh lo a, thuneitu lam hian thil awm dan hi chiang zawka an chhui a
ṭul khawp mai.

Eng thil thlengah pawh hian Mizote hi chuan hmun danga zualko emaw, kan hmingṭhat theihna tur hawi zawnga puanzar emaw hi kan ti ngai meuh lo a; Mizorama Chakma leh Bru buaina a awm pawhin India hriat danah chuan a tisualtu leh pawi khawihtu hmasa ang zelin Mizote hi tarlan an lo ni fo tawh. Tuna hostel pakhata buaina ni ve mai pawh hi hmun danga an thehdarh danah chuan Mizote'n hnam dangte an hmuhsit leh beih rawn avanga thleng ta ang maiin a lang.

Heng buaina hi a
ṭobul chu thil ho tê a ni ṭhin a, thuneitu lam a hun takah inrawlh se awlsam taka chinfel theih a ni. Tunah erawh chuan he buaina holam tak hi pawi khawihna lian tham thleng ang maiin state pawn thlengin an zualko tawh a, a hre lo tur thleng thlengin an hre tawh a, a tawpa hmingchhe tur chu Mizote bawk an ni.

Hei vang hian NIT Mizoram Boys Hostel-I buaina chhuah dan leh thil awm dan hi thuneitu lamin chiang takin chhui se, thil tisualtu chu Mizo an nih pawhin dim lo se, thu dik lo thehdarh an awm a nih phei chuan eng hnam pawh ni se hrem an phu hle a ni.