Property return thehlut lo chhui ni se

Chief minister Lal Thanhawla chuan, sorkar hnathawk zingah annual property return (APR) thehlut lo an awm ṭhin thu Assem-bly House a hrilh a; gazetted officer tan property return thehluh loh chu conduct rules (CCS) kalh a nih avangin an chungah disciplinary proceeding draw theih a ni tih a sawi a, vigilance clearance pek theih a nih loh thu a sawi bawk.

Mizoramah hian thil buaithlak deuh mai pakhat a awm a, chu chu thuneitu lu lam zawk hian sorkar hnathawkte zingah thil fel lo a awm thu an sawi fo a, umzui an ni ngai chuang lo hi a ni. Chief minister-in House zahawm takah sorkar hnathawkṭhenkhatin dan an zawm lo a, APR an thehluh ngai loh thu a sawi a, chief minister berin House-a a sawi a nih vangin thudik a ni ngei ang.

State sorkar hotu lu berin sorkar hnathawk zinga dan zawm lo an awm thu a sawi a, tute'n nge bawhzui ta ang? Amah hian hma hruai thei se duhthusam a ni a, heng APR thehlut lote hi a ṭul anga zawng chhuaka APR thehlut ngei tura hrilh turin a hnuaia mite thu pe ṭhin se a ṭha hle.

Tuna kan kal danah hi chuan sorkar hotu lam, minister leh chief minister thleng hian thil dik lo an hre thei hle a, a tidik turin ṭan an la leh tawk ṭhin lo. Sorkar hnathawkte pawh hian dan angin APR hi thehlut thlap se, eiruk venna ṭha tak a ni thei ang a, chumi piah lamah thil tisual an awm pawhin chhui a awlsam sawt ang.

Annual property return thehluh hi danin a phut avangin sorkar hian ṭha takin a kengkawh tur a ni a, eiruk venna hmanraw ṭha tak a nih theih bakah sorkar pisa inenkawlna khauh zawka kalpuina turin dan ang thlapa kal hi thil ṭul tak a ni.

Sorkar lamin hei hi an bawhzui lo a nih pawhin, RTI activist ṭhate neiin heng thilte hi chhui zui ṭhin se, NGO zingah pawh ram leh hnam ṭhatna duhtu tan chuan bawhzui chi a nih hmel. Tuna kan kalphungah hi chuan kan hotute ber hian thil dik lo an hriat thu hi mipui min hrilh bengvar a, tihdik tuma umzuitu lam hi an bo leh duak si a ang hle.