Nungcha humhalh a la kai rual lo

Tun hnaiah ram vahnaa inti palh hriat tur a awm leh zauh zauh tawh a, a vanduai phei chuan nunna an chân phah hial a ni. Hetihlai hian Mizorama lui tui hrang hrangte tura hrai, dynamo leh chinai hmanga khawih a la bâng thei lo.

Mizoramah nungcha humhalh duhna a lian tawh hle a, kum naupang zawkte zingah phei chuan nungchate hi kan ei tur ni loa kan duata kan humhalh tura ngaihna a lian ta hle. Hei hi kan inzirtirna rah duhawm tak a ni a, nungcha humhalh tura tlawmngai pawl leh sorkarin theihtawp a chhuahte kha a thlawn lo tih a lang.

Hetihlai hian thingtlang khaw kilkhawr zawkah nungcha humhalh zirtirnain awmzia a neih lohna sawi tur a la awm nual a, chumi piah lamah khawpui mi silai leh lui sate manna nei ṭha zawk nena vak chhuak ṭhin an la tam hle. Nungcha humhalh kan sawi hian thawhhona ṭha a ngai a, tute emaw humhalh sâ lo kapa lo man mai duh kan la awm hi a vanduaithlak khawp mai.

Tihluihna hmanga invau beh emaw, vengtu indaha invil reng theih a ni lo a, mihring kan inhmin a nih loh chuan inven theih a ni lo. Tun hnaiah saza humhalh lai lo kap duh maite kan awm tih hmuh khan, Mizoramah nungcha humhalh inzirtirna uar zawka kalpui a ngai tih a chiang a, kan zavaiin I ṭang thar ang u.