Mizoram House

GAD changtu chief minister Lal Thanhawla chuan, Mizoram sorkarin Mumbai-a in luaha Mizoram House a siam chu damlo leh a hruaitute awmna tur a nih thu a sawi a, "Sorkar hnathawkte tan thlen ve a rem lo," a ti a; "House-a thlen chungchangah MLA leh sorkar hnathawkte zingah inti lal deuh an awm ṭhin. Heng mite hi house enkawltute'n an ning hle a ni," a ti.

Mizoram sorkarin state pawn khawpui pawimawh ṭhen-khatah Mizoram House a siam a, hengte hi Mizo mipuite'n an chhawr ṭangkai hle. Khawpui ṭhenkhata Mizoram House-te hi chu damlote tan bika siam a ni a, chief minister sawi angin Mumbai-a Mizoram House pawh Mizoram aṭanga damlo kalte tana siam a ni. Hengte hi damlote'n an chhawr ṭangkai a, hmun danga senso sang taka thlen ngai loin an thlen theih phah ṭhin a ni.

Mizoram House ṭhenkhatte erawh hi chu a nihna takah chuan sorkar hnathawkte leh sorkar mi pawimawhte tana buatsaih a ni ber a, an zin veivaha an thlenna tur a ni a; zirlaite tan pawh heng hmunte hi ṭangkai taka chhawr theih a ni a, Mizoram aiawha zin chhuak infiammite pawhin innghahna atan an hmang ṭhin bawk. Hetihlai hian tun hnaiah sumdawng ṭhenkhat Mizoram House-a thleng ṭhin an awm a, a thlen man a tlawm avangin anni tan hian a remchang hle a; nimahsela hei hi sorkarin Mizoram house a din chhan a ni chiah lo.

Mizoram pawna Mizo khual-zinte chenna tur ni bawk mah se, sorkar thil pawi-mawh leh state tana thil pawimawha zin chhuakte tan a ni a, zirlaite leh infiammi bakah damlote tana ṭangkai tura siam a ni. Sorkar mi pawi-mawh leh an chhungte chawlh hmanga zin satliah an châm ve tlat ṭhin te, sumdawng
ṭhenkhatin innghahna taka an hmanga mi dangte tana thlen a remchang lo ṭhinte hi chu a inhmeh lo hle.

Sorkar hian Mizoram House enkawl dan hi tun aia khauh zawkin kalpui se, Mizoram sorkar hnathawk ve tho hnam dang ṭhenkhatte Mizoram House-a an inluling ṭhin nia sawite thleng hian ennawn rawh se. Mizoram House-te hi tun aia ṭangkai zawk, ṭha zawk, felfai leh thianglhim zawka enkawl theih a ni a, sorkarin ṭan la zel rawh se.