Sorkar laipui thawhpui thiam

BJP, Mizoram Pradesh hruai-tute chuan tun hnai khan thuthar thehdarhtute an kâwm a; Mizo mipui leh Mizoramin BJP sorkar leh prime minister Narendra Modi a do chuan Mizoram leh Mizo mipuite an ro telh telh dawn niin a sawi a, "Anni tan kan do a na lo. Mi state-in hma a sâwn duak duak dawn si. Chuvangin, a hlâwk thei ang bera chhawr ṭangkai turin kan rilru puthmang kan tih-danglam a ngai," an ti.

India ramah BJP kaihhruai sorkar a ding a, he political party hi Mizoramah pawl thar ni tawh lo mah se, pawl lian tak an la ni lo a, MLA pawh la nei lo an ni. He party hi sakhaw pakhat nen hmehbel a nih vangin Mizo mipui tam tak chuan political party anga en loin sakhuana mit aṭanga an en avangin an nêl lo a; nimahsela chutiang an nih loh thu BJP hruaitute'n an sawi.

Mizoramah Congress kaih-hruai sorkar a ding mek a, anni hi BJP nena inel ber an ni. Hei vang hian Mizoram sorkar pawh hi sorkar laipui lama tlatlum lo sawt tura ngaihna a lian hle a; sorkar laipuia thuneitute ber kan do miau chuan duhsak kan hlawh lo a nih pawhin thil mak a ni lo ang.

Political party-te hi chuan kalphung an nei a, duh zawng leh duh loh zawngte an nei a, thawk dun thei lo leh inrem thei miah lote pawh an awm. Hetihlai hian Mizoram sorkar tan hi chuan sorkar laipui thawhpui thiam tluka kan state tana thil
ṭha hi a awm lo a, thawh chhuah nei mang lo state kan nih miau avangin sorkar laipui hi kan lam ṭang an nih loh pawhin tawngpawng do ngawt hi chu a finthlak lo ang.

Sorkar laipui zai ngaiin Mizo-ram sorkar hi kal thiam se, politics-a ngaihdan inan loh chang awm bawk mah se ram hma-sawnna tur chuan thui tak thawhho theih a ni a; a mamawhtu zawk kan nih avangin sorkar laipui thawhpui thiam zel tum ila, chu chu Mizoram hmasawnna turin a ṭangkai dawn hle a ni.