Pathianni leh Mizoram

Election Commission of India chuan Mizoram inthlanpui vote chhiar ni atan December 3, 2023 a ruat a, hei hi Pathianni a ni. Mizorama pawl hrang hrangte chuan vote chhiar ni hi sawn turin thuneitute hnenah an thlen tawh a, political party lam pawhin an thlen tawh bawk a, ECI lam hian a ni thlak tumna an la nei lo niin a lang.

Inthlanpui hian thil ken tel tam tak a neih zinga a lian pahnih chu vote thlak ni leh vote chhiar ni hi a ni a, tunah hian a vote thlak lam zo tawh mah ila vote chhiar a la nih loh avangin inthlan hi zawh fel a la ni lo. Vote chhiar ni atana Kristian ni pawimawh an rawn thlang tlat mai hian dem a hlawh a, thil mak pawh a ni lo.

Mizoram chauh hi kan inthlang lo a, state dang pali an inthlan ve bawk avangin ECI hian state panga vote chhiar hun hi a ruala kalpui a duh a nih hmel a, Mizoram tana hun hran ruat hi thil theih a nih rualin anni thlirna lamah hian thil remchang loah an ngai pawh a ni thei. Hetihlai hian ECI hian an duh a nih phawt chuan vote chhiar ni sawn hma leh sawn tlai chungchangah hian thutlukna a siam thei a ni.

Kristian-te ni pawimawh a nih vanga chumi bawhchhe tura an thlan a ni kher lo thei a, ram puma state pangate vote chhiar rual a nih dâwn avangin a remchang bera an ngaih an thlang a ni thei tih erawh hre tel ila a ṭha ang. Serchhip biala bye-election awm khan May 2, 2021-ah vote chhiar a lo ni tawh a, hei hi Pathianni a ni a, Mizoramah Pathiannia vote chhiar hi a vawi khatna tur a ni dâwn lo.

Chutihlaiin ECI hian Mizo mipuite ngenna hi zah se, hnam tlem leh sakhaw tlem zawkte'n ngenngawl taka an dilna hi zahsak se; sakhaw thil kher loah pawh Pathiannia thil lian tham huaihawt hi Mizorama kan tih ngai loh a nih avangin ni hnih khata vote chhiar ni sawn hma leh sawn tlai hi ECI tán thil harsa lutuk a ni dâwn em ni?