Kum tawp lam hnathawh

November thla chawhnu lam kan lo thleng leh ta a, kumin chu MLA inthlanpui a awm bawk avangin hun rei tak chhung chu nunphung pangngai a khaihlak tawh a, vote chhiar kan la hmabak bawk avangin mi tam tak chuan kum dang angin hun an hmang lo ang.

Kum a tawp hnaih tawh hian mi tam tak hi chu kan inthlahdah deuh ṭhin a, kan tih ṭhin pangngai pawh ti loin kum thara tihah kan khek fo. Kumin phei chu kum dang ang lo takin inthlan kum a lo ni kher si a, hei hian chhungkaw tam tak nun a nghawng ngei ang.

Hetiangah hian sorkar hnathawkte pawh an bâng lo a, mahni hna ṭhulh ṭhaka politics lo tuipui mai te, ṭhiante election duty-a an chhuah tâk avanga mahni hna lama lo inthlahdah tawkte leh; a boruaka lo sáháwk mai chi an awm ṭhin a, a pawi hle a ni.

Kum a tawp hmain thla khat chuang a la awm a, mahni hna ṭheuhah ṭan la thar ila, a thawk tlem zawng leh a hlawk lo zawnga a state puma kan awm mai a hlauhawm a, kum a tawp hnaih tawh avang leh inthlan boruak a la nih vang hian mahni eizawnna lamah inthlahdah kher lo ila, a ṭha khawp mai.

Khawvel thilah hian hlawhtling tur chuan a tawpna khar ṭhat a, ṭha taka a hmawr bawk hi a pawimawh fo a, he inthlan kumah hian kan zavaiin mahni eizawnna leh hnaah ṭheuh uluk takin a tawp i khar ang u.