Hunpui leh ruih theih thil

Chief Secretary hoin sorkar mi pawimawhte leh pawl hrang hrang hruaitute chu tun hnai khan a ṭhukhawm a, hunpui thleng turah ruih theih thilte khauh taka khap a ṭul thu an sawi a; hâlpuah, hâlmawi leh puak thei thil dangte hal lo tura mipui hnena ngenna siam an rel bawk a ni.

Hunpui a thlen apianga a thlenpui ang mai chu ruih theih thil chi hrang hrang hluar ṭhin hi a ni a, a pawi hle a ni. Ṭum danga rui ngai zen zen lote pawhin hetiang hunah hian zalena inngaiin ruih an ching fo mai a, hemi kawngah hian chhung tinin inenkawlna leh inzirtirna ṭha zawk kan mamawh thar hle a ni.

Hetihlai hian thil ngaimawhawm tak mai chu zu khap burna state inti sia zu a zalen lutuk hi a ni a, khap hming pu duh si tihrem tuma hma la tak tak ngam lo kan ang a; zu khapna state-ah hunpui laia zu chungchang sawi nawn a ngai hi thil inhmeh lo tak a ni.

Kan ṭhalaiten an thihpui mêk leh chhungkaw tam takin an ṭahpui ruihhlo do hi tun aia uara kalpui a ngai a, he hunpui lo thleng turah hian ruihhlo hi nawr tawm ila, a hunlaia chêt ringawt a tawk loh avangin tun aṭangin ruihhlo do turin sorkar a insan mar a ngai ta takzet a ni.