Zirna ina ruihhlo do

Ruihhlo do chungchanga hmalakna chi khat, Nasha Mukt Bharat Abhiyaan, Aizawl District hnuaia Sub-Committee on Drug Prevention in Schools and Colleges te chu tun hnai khan Aizawl Bawrhsap hoin an ṭhukhawm a, an hmalakna leh hmachhawp hrang hrang an thlirho. College zirlaite aṭangin Master Volunteer-te ruat a, training pek an nih hnuah an rualpui ṭhalai/zirlaite zingah ruihhlo ṭhat lohzia leh a invennate an zirtir dan turte an sawi a, college hrang hrangah hian zirtirtute kaihhruaina hnuaiah Anti-Drug Club te din an rel.

Mizorama ruihhlo hluar mêk do tur hian kawng hrang hranga beih a ngai a, ruihhlo lo lut tur dang tura ṭan lâk a ṭul rual hian; ruihhlo a lo lut a nih pawha ti lo tura inzirtirna hi tun aia chak zawka kalpui a ngai.

Thil kan sawi apianga kan puh leh kan rawt awlsam ber chu, 'chhungkua aṭanga ṭan a ngai' tih leh ṭhin hi a ni a. Chu chu kan lo ti lo zo tawh a, he dinhmunah hian kan ding ta a ni tih kan pawm a ngai a, chhungkuaa kan inven theih tawh si loh avangin khawiah emaw hian kan ṭan tlan a ngai a, chumi tur chuan zirna in hi a pawimawh hle a ni.

College lama hmalak tumna awm hi a lawmawm a, hetihlai hian zirna in hniam zawk lamah hian ruihhlo do beihpui thlak ni se, a tlem berah thla khata vawi khat tal ruihhlo hlauhawmzia leh a invenna lam zirtir hi kalpui ṭhin ni se, awmzia a nei ngei ang.