Vote chhiar ni nungchang

Mizoram MLA inthlanpui atana vote thlan chu November 7 khan tluang taka zawh fel a ni tawh a, December 3 hi vote chhiar hun tura Election Commission of India-in a ruat chu a ni. Mizorama kohhran leh pawl hrang hrangin December 3 hi Pathianni a nih avangin vote chhiar hun sawn turin thuneitute an ngen a, tunah hian ECI dawr turin pawl hrang hrang hruaitute an zin mêk bawk.

Vote chhiar ni hi ECI lam hian luhlul chhuaha an sawn duh lo lui a nih chuan mipui lam hi kan inbuatsaih thiam a ṭha dâwn a, Pathianni serh duhna lian tak kan neih hi vote an chhiar lui a nih pawhin a mipui lamin a dawnsawn dan kan thiam phawt chuan mi nawlpui hlauhthawn anga sahawk lo hian a awm theih ang.

Bial 40-a inthlang kan ni a, MLA 40 chu an tling ngei dâwn a; political party lian pathum hruaitute chuan sorkarna siam ngei an inrin thu an sawi vek tawh bawk.

Hei vang hian a political party lam pawh inbuatsaih ṭha se, an lawm pawha lawm dan chintawk hre tur leh, an beisei ang result an hmu lo palh a nih pawha khawsak dan thiam tura tun aṭanga inzirtir a ṭha hle ang.

Inthlan chungchanga thuneihna neitu ECI hian Mizo mipuite ngenna hi a ngaithla duh lo a nih pawhin, a Mizo mipui zawk hian Pathianni tibawrhbang lo zawngin inthlan result hi dawngsawng thiam ila, vote chhiar nia kan nungchang hi fimkhur thiam a pawimawh dâwn hle a ni.