Zu khapna hnuaia zu hmun

Tun hnaiah Central YMA hruaitu thlan tharte leh Mizoram Journalists' Association hruaitute an inkawm a, Mizoram dinhmun an thlir a, ruihhlo leh zu hluar ta lutuk chu CYMA-in an ngaimawh thu sawi chhuah a ni.

Mizorama ruihhlo a zalen thu leh, a hlawm liana an man nasat thu a sawi rualin CYMA President thar chuan, drugs lam ringawt rilruah a lan ṭhin lai hian zu lam pawh ngaihtuah a ṭul ta viau tih a sawi a, Rangvamual leh Phunchawnga zu sakna hmun a tam ta lutuk chu veiawm a tih thu a sawi a. “Drugs ang thoin zu kan chhiatpui tawh niin a hriat a. Zu ṭha in tur hmu zo loin Rangvamual leh Phunchawnga zu siam an in lo thei si lo a. Heng hmuna zu saknate hi hnatlang neiha han vil leh deuh tur emaw ni tih chu rilruah a awm,” a ti.

Mizoramah hian dan hnuaiah zu zawrh a lo ni tawh a, Congress hunlaiin zu an zuar a, chu chu kohhran leh pawl hrang hrangin an duh lo a, political party dang pawhin an duh lo. Zu zawrh duh lo MNF-in sorkarna vawn fung an rawn chelh ta a, zu duh lo em ema insawi siin dan loa zu siam tihrem tumin thapui an thawh lo a, zu khap burna hnuaiah langsar takin zu hmun a awm thei a, sorkar tan mualphona a tling.

Heng zu hmunah hian dan loa zu an zawrh avangin an zu neihte hi a chhe em em a, hei hi in lo thei lo Mizo ṭhalaite thoin an in a, an nunna pawhin a tuar nasa hle a ni.

Zu khap a nih dan te, zu tihrem tumna awm tak tak si lo te, a sorkar aia tlawmngai pawlin zu tihrem tuma thapui an thawha a sawt zawk dante hi ngun taka ngaihtuah ngai a ni a; 2023 MLA inthlanpuiah hian tu pawh sorkar se, zu chhe tak zalenna rama Mizoram kan chhuah ta hi en liam mai mai suh se.