ECI thutlukna zah thiam ila

Mizorama pawl hrang hrang aiawhte chuan vawiin hian Election Commission of India hotute an dawr dâwn a, Mizoram MLA inthlanpui vote chhiar hun December 3, Pathianni chu sawn turin an ngen dâwn a; Mizoram Kohhran Hruaitute Committee (MKHC) chuan he mi chungchangah hian kohhran hrang hrangte ṭawngṭai turin a lo ngen tawh.

Mizote tan chuan Pathianni hi thil dang tihna remchang lo, Pathian tana kan serh hran ni a ni. Kohhran a inan loh avangin Sabbath serh leh Pathianni serh awm hrang mah ila heng ni serhte kan zah dan leh kan hman ṭhin dan chu tlang hriat a ni.

He niah ber kher inthlan vote chhiar tura ruahmanna awm hi kohhrante leh tlawmngai pawlten an duh lo a, kan ram nen inhmeh loa an hriat avang leh kan sakhaw ni pawimawh palzutna anga an ngaih avangin ECI-ah sawn turin an lo thlen tawh.

Tunah chuan ECI hotute a hmunah ngei kal chilhin vote chhiar ni sawn turin an ngen nawn leh dâwn a, ECI hian eng angin nge an lo dawn sawn ang a, eng thutlukna nge awm dâwn hriat a ni lo.

ECI-a kan thlen nawn tawh hnuah hian eng thutlukna pawh lo awm se pawm thiam ila, kan duhthusam niah vote an chhiar ta lo a nih pawhin ṭha taka kan ngen tawh hnuah chuan lungawi lohna lantir zawnga kalpui loh ni thei se a mawi hle tawh ang.