Khual zin thlen in

Sorkar laipuia Panchayati Raj hnuaia Rashtriya Gram Swaraj Abhiyan (RGSA) kaltlanga Tuipui-D leh Darzo inkara Rural Homestay and Agro Tourism atana in (cabin) pali sak thar chu tun hnai khan hawn a ni.

Mizoramah hian khualzin thlenna in chi hrang hrang hi kan nei thluah tawh a, sorkar ta a ni deuh zel. Tun hnaiah mimalin khualzin thlenna tur hmunhma an siam uar thar a, hotel mai bakah guest house leh homestay-te pawh a awm ta nual a, hmasawnna lawmawm tak a ni.

Hetihlai hian Mizoram khawpui ber Aizawlah pawh thil lian tham deuh thlen dâwn chuan khualzin thlenna hi a indaih hleithei lo a, mi 100 rual chin mikhual a ruala thlen chuan kan buai a ni deuh thawthang ṭhin. Heti chung hian tourism lamah kan ṭhangharh mêk kan ti bawk a, an thlenna tur in kan neih zat leh kan neih dan thlir hian, hmasawnna tur kan la ngah hle.

Sorkar thil pawimawh leh sumdawnna kaihhnawiha zin ni lo a hranpaa a ram en leh chen tura zinte hi chuan thlen in hi an duh hautak teh chiam lo a, inthiarna leh tui in tur thianghlim a awm chuan an duhtawk thei deuh mai. Hei tak hi kan tlakchham a ni duh hle a, khualzin thlen in kan neih tam takte hi a balin a ṭawp a, sorkar ta hi a ṭawp zual emaw tih turte a ni ṭhin a, a vanduaithlak hle a ni.

Ṭhenawm state-te'n sum lakluhna atana an hman tourism hi kan thlir dan leh kan kalpui danah hmasawnna tur a tam a, khualzin thlen in fai leh thianghlim, inthiarna fai leh uluk taka enkawl hi kan ṭhan zelna tur a ni awm e.