Naupang ven ngun an pawimawh

Mizoram Police Crime Report tarlan danin kum 2020-2022 chhungin Protection of Children from Sexual Offences Act (POCSO) hnuaiah naupang kum tling lo khuaikhem thubuai 320 ziah luh a ni.

Mizoramah kum thum chhungin naupang khuaikhem thubuai gheti zat an ziak lut tih hriat hian kan ram dinhmun thui tak a tilang a, ṭan lak a ngai takzet tih a nemnghet. Naupang enkawl hi nu leh pa kut a ni tehmeuh a, chutih rualin a ram puma kan ngiahven a, inzirtirna ṭha zawk kan neih a hun takzet a ni.

Thil engkim mai chinfelna tur hian, 'Chhungkuaa bul ṭan a ngai' klan ti ṭhin a; nimahsela chhungkuaa bul kan ṭan tawh loh zawk avangin tun dinhmun hi kan thleng a ni. Naupang tam tak hi chu kaihruaitu nu leh pa nei ṭha tawk lo an awm thei a, nu leh pa ṭhenkhat hian hemi lam hawi zawnga zirtirna hi an nei lo thei bawk a, hei vang hian kan zavaia kan ṭan tlan a ngai ang.

Mobile phone kan kawl deuh vek tawh a, internet nen kan thlun zawm tawh avangin zahmawh lam rawngkai video-te hi naupang khawih phakah a awm tawh a, hengte hi inzirtirna ṭha tel lo chuan inkhap tum ringawt a sawt lo palh thei.

Nu leh pa leh puitling tawh chin chuan naupang awmna hmun a him leh him loh te, an chhehvelah mi rinhlelhawm an awm thei em tih te, hmun fianrialah an awm em, tihte thlenga thlithlai a ngai a. Kan rama sualna pung zel en hian hur sualna kawnga naupang khuaikhem hi a thlen tam zel lohna tura a inzirtirna lam hi kan kalpui nasat a ṭul ta takzet a ni.