Aizawl khawpui kan enkawl dan hi

Mizoram sorkar chuan tunlai hian Aizawlah two wheeler taxi permit a pe chhuak mek a, tun hnaia a pek chhuah hi 1,300 chuang a ni tawh. Aizawl Two Wheeler Taxi Association (ATTA) hruaitute chuan,  Aizawlah two wheeler taxi tlân (service) lai 496 a awm mek thu leh, sorkar chawlhah chuan tlanna tur a vân thu an sawi. 

Sorkarin tun hnaia Aizawla ser­vice tur two wheeler taxi permit a pek chhuah dan en hi chuan Mizoram sorkar hi a ṭang rual lo hle tiin a puh theih a, sorkar department ṭhenkhatin traffic jam a ziaawm theih­na turin theihtawp an chhuah a ni. Tuna Aizawl khawpuia veivak reng tur two wheeler taxi 1300 chuang an pek belh leh chuan traffic jam a belhchhah nasa dawn tih a rin theih. 

Hei aia ngaih pawimawh tur zawk nia lang chu two wheeler taxi neitute eizawnna hi a ni. Eizawnna ṭha pangngai tak kal mek hi eizawnna atana hmantlak mang loha an inṭam chhuah palh mai thil hlauhawm tak a ni. A mipuite tana hna siamsak leh eizawnna kawhhmuhsak hi sorkar tih tur a ni a; amaherawhchu eng ang eizawnna nge a nih a, chu chuan eng harsatna nge a ken tel, tihte chhut tel a ngai. 

Sorkarna vawnfing chelhtu nih avanga mi harsatna pawh ngaithla duh lo leh, rawtna awm pawh engahmah ngai lo ram hruaitu kan nei palh ang tih pawh thil hlauhawm tak a ni. 

Two wheeler taxi permit hi pek belh tawh miah loh tur chu a ni hauh lo ang a; nimahsela a awm sa lêt aia tam permit pek belh a nih chuan he eizawnna hian nasa takin a tuar thei. Chumi piah lamah politics thila laa MLA-in quota an neite hi thil mak tak a ni a, sawisel lohna tur an nih beisei niawm taka eptu MLA-te pawh quota an pe lehzelte hian Aizawl khawpui kan enkawl duh dan a tilang chiang hle. 

Aizawl khawpui hian duattu a mamawh a, tuna kan enkawl dan en hi chuan he khawpui harsatna hi a pung zel ang tih hlauhawm tak a ni.