Eizawnna leh khawpui

Aizawl Municipal corporationhotute leh Aizawl City Local Council Association (ACLCA) hruaitute chuan, January 15, 2024 aṭanga chenna in aṭanga ft. 100 aia hnaia vawk vulh khuahkhirh dan tur an rel tawh chu tun hnai khan an ngaihtuah.

Aizawl khawpuia vawk vulh khapna dan hman tur hi kawng hrang hrang aṭanga thlirin thil ṭul tak leh thil tihâwm tak a ni a, chutihlaiin eizawnna tihtawp tur eng emaw zat a awm avangin ngaihtuah ngun ngai tak a ni awm e.

Mizoramah hian eizawnna a harsa em em a, khawpuiah mirethei tam tak an awm a, a kum telin an pung zel. Heng mi harsa zawkte tana eizawnna remchang ṭha tak pakhat chu vawk vulh hi a ni a, khawpuiah chuan mihring chaw ei bang nawi ringawt pawh vawk vulhtute tana thlakhlelh tham a tling a, tute emaw tana eizawnna ṭha hi chu a tawp dâwn tihna a ni ang.

Hetihlai hian khawpui ṭhang zel leh hmasawnna avang hian eizawnna ṭhenkhat hi chuan a tuar lo thei lo a, Mizoram khawpui Aizawl pawhin hmasawn a duh chuan thil ṭhenkhat hi chu tihtawp a ngai a, chumi zingah chuan chenna in hnaia vawk vulh pawh a tel dâwn ta a ni.

Hetihlai hian harsatna bîk neite tan Local Council phalna neiin AMC lamah thlen theih a ni a, eng chin nge an hriatthiam dâwn la hriat loh mah se, chhungkaw eizawnna ber a nih hi chuan ngaihtuahna sen zau theih ni ṭhin se a lawmawm ang.