Mipui puihna an mamawh dawn

Mizoram state legislative assembly inthlanpui vawi kuana chu tluang takin zawh a ni a, MLA nia Mizoram mipui tana rawngbawltu turte pawh kan hre ta a; ram leh hnam leh mipui tan ṭha tak leh rinawm taka hna an thawh ngei theih nan duhsakna kan hlan a ni.

Inthlanpui leh a kaihhnawih thil hrang hrangte zawh a ni thawkhat ta a, rokhawlhna leh harsatna lian tham awm loin inthlan leh a kaihhnawih thil chi hrang hrangte kan ti zo thei niin a lang a, a lawmawm tak zet a ni. Inthlan vote thlak leh vote chhiar buaipuitu zawng zawng te, inthlan a hlawhtlin theihna tura mahni zawn ṭheuha ṭhahnemngai taka thawk zawng zawngte an chhuanawm hle mai.

Tun ṭumah chuan sorkarna siam tur, ram leh mipuite kaihruaitu tur, ram leh hnam tana roreltu turte kan hre ta a. Kan hriat angin, tun ṭumah hian tun hmaa sorkarna la chelh ngai lo, kum ruk chauh la ding party thlan tlin an ni a. Inthlan result thlir hian, kalphung thar thlir, ṭhalai, sorkar hnathawk, upa lam te, mi harsa zawk, beiseina nena Zoram thar thlir an tam hle tih a hriat thei a; mipui beiseina chu tihlawhtling tura rinawm leh taima taka an thawh a ngai ngeiin a rinawm.

Mizoram sorkar kaihruai tura thlan tlin tâkte hi an la tharlám ang bawkin sorkar kaihhruai leh enkawl kawngah pawh an tan thil thar tam tak a awmin a rinawm. Mizoram leh a chhunga chengte tana ṭha ber tura an kal theih nan te, ṭha taka ram an kaihhruai theih nan te, dik taka ro an rel theih nante mipuite'n ṭawngṭaina nen an puih an mamawh dawn a ni.