Mizoram leh sorkar thar

Mizoram MLA inthlanpui chu tluang taka zawh fel a ni ta a, ZPM chuan MLA 27 neiin sorkarna siam dâwn ta a, MNF chu term khat hman zoin an tla ta a ni.

ZPM hian mipui hnenah kalphung thar an tih chu an tiam a, chu kalphung thar chu an sawi tawh a, an hrilhfiah nasa tawh a, tunah chuan a taka an kalpui a ngai dawn ta a ni.

He kalphung thar tiamtute hi mipuiin an thlir reng dâwn a, an intiam anga an awm leh lo a nih chuan a thlang tlingtu mipuite hi paih thla leh theitu an ni.

ZPM hian sorkar ṭha an tiam hi mipuiin an hmuh ngei an duh dâwn a, tun hmaa Mizoram enkawltu political party-te kal danah duh khawp lohna an neihte an sawi ṭhin hi a taka siam ṭhat an tum ngam tur a ni.

Hetihlai hian sorkar tharin a hmachhawn hmasak ber tur chu sum harsatna a ni a, ZPM a sorkar tak avangin sum hi a pung thut dâwn lo a; sum thawh chhuah dan tur thar duan leh, inrenchemna lam uar taka kalpui hi a ṭul takzet dâwn a ni.