Zirtirna kalpui dan

Mizoram Mathematics Society (MMS) leh Mizoram Science, Technology & Inno-vation Council (MISTIC) ṭang-kawp chuan tunlai hian Mathematics Summer Camp an buatsaih a, chawlhkar hnih a awh ang. Pawl 10 leh 11 zir turten sikul chawlh laia mathematics zirna kawnga hma an sâwn theih nan leh state dangte el pha khawpa thiamna an neih theih nan camp hi an buatsaih a ni.

Mizote zingah mathematics hi subject harsa bik anga ngaihna a lian ṭhin hle a, hun rei tak chhung chu zirlaite pawhin mathematics hi an thiam lo mai ni loin subject hlauhawm bik ang hialin an en hman niin a lang. Tunah erawh chuan ngaihdan a inthlak ṭan mek a, Mizo zingah ngei pawh mathematics thiam tak tak awmin a pawl bikte an ding ta a, thil lawmawm tak a ni.

Zirna kan kalpui dan hian zirlaite hi nasa takin a nghawng a, zirtirtu ṭha chuan naupang thiam lo deuh zawkte pawh an khai chhuak ṭhin a, naupang thiam deuhte chu thiam leh zual turin an chher chhuak ṭhin. Chutiang ti tur chuan zirtir dan thiam a ngai a, hei tak hi zirtirtu ṭha leh ṭha lo danglamna a ni a, zirna kalphung (system) ṭha leh ṭha lo tehna pawh a ni awm e.

Mizorama zirna kan kalpui danah hi chuan lehkhabu chhunga inziak thiam bel hi kan tum hmasak ber a ni ṭhin a, vawng (bye-heart) hnem theite hi a tiṭha an ni mai ṭhin. Hei hi ram changkanga an kalpui dan a ni tawh lo a, thiamna hman nghal theih lam hi an uar em em a, zirlai thiam tura an zirtir dan kalphung pawh a danglam hle a ni.

Zirna hi a nuam tur a ni a, zirna in pawh zirlaite tan pan chakawm a ni tur a ni. He mi kawngah hian Mizorama zirna kan kalpui dan hi thlak danglam a la ngai nasa a, tun hnaiah kalphung thara kai tumin zawi zawiin ṭan lak mek a ni a, a lawmawm khawp mai. Tun hnaia MMS leh MISTIC-in mathematics zirtirna kawnga
ṭan an lak dante hi a entawntlak a, hei hian Mizo zirlaite hnenah rah ṭha tak a chhuah ngei ang tih a rin theih.