Sorkar thar leh leiba

Mizorama kum nga chhunga roreltu tur chu thlan fel a ni ta a, ZPM-in kum nga chhung ro an rel dâwn ta a ni. Mizoram sorkar hian hmun hrang hrangah leiba tam tham tak a nei a, hei hi sorkar tharin a buaipui zui a ngai ang.

Sorkar leiba neih zat tak hi chhut dan hrang hrang a awm thei ang a, a ṭhahnem tham hle tih a chiang. Heng leiba hi Sorkar thar tan rulh zawh sen rual a ni lo mai thei a, engtin nge an buaipui zui tih hi mipuiin an ngaihven hle ang.

State hian sum a thawh chhuah loh chuan sorkar laipui aṭanga sum lo kal ang ang lo hman hi a tih theih tawk a ni mai a, a hman zawh tawh miau chuan pûk belh zel loh chu tih theih a awm meuh lo ang.

Hei vang tak hian thawh chhuah nei lo state tan chuan sum awmsâ ren taka hman hi a pawimawh dâwn a, inrenchemna lam hi uar taka kalpui ngam a ṭha ang. Chutiang tur chuan sorkar sum sen ralna tam takah an insum ngam a ṭul dâwn a, sorkar sum hmanga nuam tawl theihna ang chite tihtawp hi sum thawh chhuah dan chi khat a ni thei ang.

He sorkar thar hian sum lakluh dan a ngaihtuah chhuah thiam a ngai dawn a, leiba neih belh zel lo turin a tir aṭangin ruahmanna a siam a ngai dawn a, huaisen taka ke pen ngam a ṭul ang.