Sorkar thar kan nei ta

Mizoram sorkar thar lak luh a ni ta a, sorkar thar kan nei ta. Chief minister thar kan nei a, minister thar 11 kan nei bawk a; a lawmawm hle mai a, ram leh mipui tan ṭha taka hna an thawh ngei mipuite'n kan beisei dawn a ni.

Chief Minister leh minister tharte hi tuna an nihna leh dinhmunah hian mi thar vek an ni a, an vawi khat nihna vek a ni. Chuvangin, thil ṭhenkhat han bahlah deuh emaw, nihphung hriat mai lohte pawh awm ve thei a ni a, mipuite'n sawisel nghal bawrh bawrh mai loa hriatthiam chi kan neih ve pawh a ngai mai thei e. Thil tam tak hi chu tawn chawpa hriat chawp a ni ve hrim hrim mai a, an inzir ang a, an hre ve zelin a rinawm.

Sorkar thara kan hotute hi inthlan hma aṭanga an inzawrhna avanga mipuiin roreltu atana an duh leh roreltu ni tura an thlan an ni a, an lakah mipui beisei a sang hlein a hriat a. Sorkar ṭha din chungchangah, sorkar kan neih tawhte laka an beisei aia sang mah tun sorkarah hian mipuiin beiseina an nei pawh a ni thei.

Sorkar thar hotute hian mipui beisei hi an tihpuitlin a ngai dawn a, mipui hi beidawng loa an siam a ngai dawn a; chumi tur chuan thuneihna an chan phat aṭang hian tum mumal tak leh tih tur bithliah fel tak neia an kal chhoh a ṭul viau ngei ang.

Mipui lam pawhin sorkar hotute chim dan tâwk te, anmahnia beisei dan tur tâwkte kan neih thiam a ṭul. Ram hruaitute hi kan chhungkhat laina hnai, kan ṭhian ṭhate an nih avanga anmahni aṭanga hamṭhatna leh hlâwkna neih tumtu ni lo turin invéng ila, thil dik lo leh thil ṭha lo an tih phahna tura nawrtu ni lo ila, thil dik lo an tih palh theihna laka vengtu, ṭanpuitu leh ṭawngṭaisaktu ni zawk ṭheuh ila, an tan chhungkhat leh ṭhian ṭha dik tak kan ni zawk thei ang.