Mipuiin ni 100 an nghak dawn

ZPM sorkar lakluh niah Chief Minister-in press mite hmaah ni 100 chhunga an tih turte a puang a, ruahmanna ṭhahnem tak an nei.

Mizoram chuan sorkar thar a nei ta a, he sorkar hi eng sorkar nge a nih tak tak chu an term tawp hun; kum nga hnuah a lang dâwn a; ni 100 hnuah pawh a ruangam chu a hriat theih tawhin a rinawm.

Sorkar kalphung sawi danglam an tum dante hi mipuiin an chhinchhiah dâwn a, a taka an kalpui si loh chuan mipuiin sorkar tharah rinna an hloh ang. Chutihlaiin inrenchemna tura ruahmanna ang angte pawh an kalpui thei a nih chuan mipuiin sorkarah rinna an nghat ang.

Mipuiin an hmuh châk chu sorkar huaisen leh dik a ni a, chu chu a taka a thlen chuan ZPM hian hun rei tak chhung rorelna vawnfung an chelh thei ang. Chutihlaiin ni 100 chhunga an tih tura an chhawp chhuah angte pawh an ti thei lo nghal a nih ngai chuan, mipuiin he sorkar thar leh an kalphung thar zawrh hi an ring lo thei a, chuvangin ZPM tán ni 100 hi a pawimawh dâwn hle a ni.