Bru thil phût

Home minister chuan Tripura refugee camp-a Bru-te'n an awmna hmuna vote an thlak lohna turin Mizoram sorkarin theihtawp a chhuah zel dawn tih a sawi a, Bru-te thil phût tam tak chu tihhlawhtlin chi a nih loh thu House a hrilh.

Home Minister-in House-a a tarlan danin, Tripura refugee camp-a Bru awm zat hi hriat ni lo mah se, sorkarin Road Map-4 a siam ang chuan puitling 9,264 leh naupang 11,146, an vaiin mi 20,710 awm anga ngaih a ni. Mizoram ang mipui chen tam lohna state-ah hi chuan mi 20,000 chuangin an belh a nih chuan kawng hrang hangin nghawng a nei dawn a, an zavaia an lo kir a nih phei chuan sorkar tan pawh inbuatsaih ṭhat a ngai dawn hle a ni.

Bru-te hian thil phût eng emaw zat an nei a, chung zingah chuan - 'Bru rawn kîr lehte chhungkaw tin hnenah an in tundinna tur ram pek,' tih a tel a, 'Khaw khatah a tlem berah chhungkaw 500 tal awm a, electric, tui, sikul, anganwadi, damdawii-in, kawng ṭha, etc. pek' tihte bakah 'Ministry of Tribal Affairs hnuaiah Primitive Tribal Group nihna Bru-te pek,' tihte a tel.

Bru thil phûtte hi ngun taka ngaihtuah chuan, Mizoram chhunga Bru inrelbawlna a hranga neih tumna a ang ber. Mizoramah a hranga ram neih an duh phawt a, chutah chuan inenkawlna ṭha tinreng dawn an phut a, chumi piah lamah chuan chhungkaw 500 tal a huhoa awm khawm zel an tum tihna a ni. Hengte hi Mizoram sorkar tan phalsak chi a ni lo a, Home minister-in a tih theih loh thua a chhang hi a tih tur dik tak a ni.

Ngun deuha ngaihtuah ngai chu Bru-te an thil phût kawnga an huangtau em em mai hian chhan a neih ngei a rinawm a, chhui zui a ṭha ang. Tripura-a raltlang anga an awm chhung hian thil tam tak an zir tawh a, sorkar laipui pawh an be pawp reng a, an hamṭhatna tur awm theite hi an dap thiam hle. Tuna thil phût hraw tak tak an nei ngam pawh hi a dik tawh lo a, Mizoram
aṭanga an tlan chhuah dan boruak nena thlir phei chuan 'Kashmiri Pandit leh Tamil refugee-te anga ṭanpuina sum dawn' an phût ngamte leh 'Ministry of Tribal Affairs hnuaiah Primitive Tribal Group nihna' an han dilte hi chu an huangtau hle a ni. Bru thil phûtte hian Mizorama ram leilung fate mitmei an veng lo hle niin a ngaih theih a, heng an thil phûtte nena Mizorama an lo kir hi Mizorama Mizote hi chuan an phal theiin a rinawm lo.