Kohhran rorelna pawm thiam

Mizorama kohhran lian ber leh member nei ṭhahnem ber Mizoram Presbyterian Kohhran rorelna sang ber, Synod inkhawmpui vawi 100-na chu a ṭiak ta a, tibuaitu leh harsatna lian tham tâwk loa tluang taka neih a ni hi a lawmawm. Inkhawmpui hmangtu zawng zawngte'n taksa, rilru leh thlarauah hlâwkna an chan vek beisei ila.

Synod-in a rèl zingah inkhawm tihtlem chungchang leh sakramen uain atana Mizorama thar grape sàwr tui hman rawtnate kha sawi zui hlawh leh mipui náwlpuiin an ngaihven berte a nih a rinawm. Inkhawm tihtlem rawtna a tlang lo a, tuna kal anga kal zel turin an rél a; Mizoram thar grape tui pawh sakramen atan hmang loin, tuna hman mek Tinture Cardamon Wine chu hman zui zel turin an rél a ni.

Heng thil chi hnihah hian kohhran mipui mai bakah, kohhran hruaitute zingah pawh ngaihdan a phír hle niin a lang. Kohhran inkhawm tihtlem duhtu mi tam tak an awm, mahse, inkhawmpui thutlukna a awm tâkah chuan inkhawm tihtlem hi a la hun rih loah ngai thei ila a ṭha hle.

Mizo thar leh siam ngei grape tui pawh sakramen atan hman ni se, tia duhtu kohhran mipui zingah tam tak an awm niin a lang a. Sakramen uain man cheng nuai tam tak Mizoram páwna a chhuah reng ai chuan, sakramen uain mana hlâwknate chu Mizo ngeiin an têl theih an duh vang niin a lang.

Mipui ngaihdan a thuhmun lo a, kohhran mipui aiawhtu kohhran hruaitute ngaihdan pawh a thuhmun lo ṭhin. Heng karah hian, kohhran rorelna sang thutluknate hi kohhran mipuite'n kan pawm thiam a, kan zah a, kan zawm thiam a ṭul hle.