Pisa kai ṭan leh hunserh hman

Mizoram sorkar thara minister-te chuan December 11, 2023 (Thawhṭanni) khan an pisa tur ṭheuh an luah lut ṭan ta. Pisa an luah luh ṭanna pualin inkhawm tâwi an hmang deuh vek a, hunserh hmangin, Pathian hnena inhlanna hun an hmang deuh vek a; hunserh hmangtu atan rawngbawltu serh hrante an hmang tlangpui bawk.

Mizoram hi Kristian ram a ni a, Mizote bik chu Kristian vek kan ni, ti ila kan sawi sual tam lo ang. Sakhaw mi lo ve takte leh inkhawm ngai reng reng lote pawh Kristian kan ni deuh vek a, chuvang chuan thil tih khawm nikhua leh pisa luah ṭan nía hunserh hman a, Pathian hnena inhlanna hun hman hi a àwm em em a ni.

Hetih lai hian, hunserh hmante leh Pathian hnena inhlanna hun bik siamte hi lan mawina atan chauha tih ni lo se a duhawm hle a, Pathian hnena kan inhlanna te, dik tak, ṭha tak leh rinawm taka hnathawk tura inhlannate hi kan minister-te minister an nih chhung zawnga vawngtu, kawng dika hruaitu ni ngei se.

Tun hma pawhin minister pisa luah ṭan nía Pathian hnena inhlanna hun hman a lo ni tawh ṭhin. Chumi hnu lam zela thil awm dante mipuiin hre kîlh kêlh lo mah se, an hre nual hlawm a; chu an hriatna hmang chuan minister-teah pawh ngaihdan an siam ṭhin.

Chutiang chu tuna minister tharte chungah pawh a ni dawn. Pisa ṭan ní-ah hunserh hmangin Pathian hnenah inhlân mah se, kum 5 chhunga an kal dan leh thil tih danin a zir loh chuan pisa ṭan nía an hun hman hian a chhan dawn lo. Hunserh hman leh Pathian hnena inhlan hi a ṭha em em; a pawimawh zawk erawh chu–hunserh kan hman chhan Pathian duh dan anga rorelna kalpui a, dikna, rinawmna, takna, huaisenna nena hna thawh a ni.