Tlâk hlau sorkar vs tlâk huama hnathawh

Chief minister Lalduhoma chuan December 11, 2023 Thawhṭannia an party pisaa thu a sawiah, an hnathawh hmanga mipuiin sorkar leh tlâka an ngaih theih nen leh tlak huama hna an thawh dawn thu a sawi a, a kaihhruai sorkar chu an hnathawh aṭanga endik turin mipui a cho a ni.

Ram hruaitu lu berin hetianga thu a sawi ngam leh chona ṭha hmanga mipui a cho hi thil lawmawm tak a ni a, an cho ang taka mipui hneh zo tur khawpa hna an thawk tak tak a nih ngat chuan Mizoram leh Mizo mipui tan thil lawmawm tak a ni dawn a, ramin hma a sawn ngeiin a rinawm.

Mi tam tak chuan Mizoram hian 'tlak hlau sorkar' a lo nei tawh ṭhinah an ngai niin a lang. Inthlan dawn apiangin sorkara thil phût nei pâwl chi hrang hrang an lang tuam tuam a, lungawi lohna lantir dan chi hrang hrang nen sorkar an nawr a. A tàwpa tàwpah chuan sorkar a ṭang zo lo a, a hmaa theih loh kha thil theihah a chang a, an tihlawhtling leh nge nge ṭhin. A chhan ber chu inthlan a hnai tawh a, vote a hloh phah an hlauh vang leh tlâk an hlauh vang a ni ber àwm e. Hetiang hi tlâk hlau sorkar an tih chu ni berin a lang.

Tlâk hlau sorkarah chuan sorkar hotute'n mipui leh pawl reng reng hi voter hmuhin an hmu vek tawh mai a. Ram leh hnam leh mipui náwlpui tana ṭha lo zawk leh, sum leh pai dinhmunin nasa taka a tawrh theihna turah pawh tlak an hlauh miau avangin thutlukna mak tak an siam leh mai ṭhin.

Chief Minister-in a kaihhruai sorkar chu a hnathawhah endik tura mipui a cho ngam te, tlâk huama hna an thawh tur thu a sawi hi mipui tan chuan a thlamuanthlak hle mai. A sawi angin tihlawhtling ngei bawk se tih hi mipui beisei leh duhthusam a ni ngei ang le.