Sum dinhmun siamṭhat nan inrenchem

Larsap Dr Hari Babu Kambhampati chuan December 13, 2023 (Nilaini)-a Assembly session-a tuh a sawiah Mizoram sorkar sum dinhmun a ṭhat loh avangin state economy chu dinhmun hlauhthawnawmah a din thu a sawi a; sum pûk tam lutukin nghawng ṭha lo a neih thu te, state sum dinhmun siamṭha turin theihtawp chhuah a nih dawn thu leh inrenchemna kalpui a nih dawn thute a sawi bawk.

Governor thu sawite hi ngaihtuah chian ngai tak a ni a; a bik takin sum dinhmun chhia chungchang hi ram hruaitute tan chuan mutmawh hnàrmawha neih chi a ni a, sorkar official-te tan nasa taka ngaimawh chi a ni a, mipui tan pawh ngaihven ngai tak a ni.

Mizoram sorkarin sum eng emaw zat la lut ve bawk mah se, state dangte ngaihtuah chuan a té tham hle a, tun aṭanga hun eng emaw ti chen chu state sum lak luh hi state sum dinhmun siamṭhatna tur khawp a tlingin a rinawm lo.

Sum dinhmun ṭha lo siamṭhatna atana ṭangkai tur pakhat chu inrenchem, sum hman tihtlem a ni ngei ang. Governor ngei pawhin Assembly House-ah a sawi a, inremchemna kalpui a ni dawn a, hotu sángte aṭangin bul ṭan a nih dawn thute a sawi a, a lawmawm hle. Chief Minister pawhin inremchem a nih tur thu leh chuta tan chuan CM leh minister-te hamṭhatna dawnte tihtlem a nih dawn thute a lo sawi tawh a ni.

Sum dinhmun chhia siamṭha tura ram hruaitute mahni inhrêk zawnga an kal tur hi a lawmawm a, rah ṭha tak a chhuah ngei pawh a beiseiawm hle. Sorkar hnathawkte pawh state sum dinhmun a ṭhat lohzia hre chiangtu an ni a, ram hruaitute hnung zui a, inhrêk a ngaihna laiah an inhrêk ngam ve a ṭul ang.