Biometric attendance hman tur hi

December 13, 2023 (Nilaini)-a Council of Ministers ṭhukhawm chuan sorkar department tinah pisa kaite chhinchhiahna atan biometric attendance system hman turin an rêl a, bul ṭanna atan Secretariat an thlang nghal bawk. Hei hi thil ṭha tak niin a lang a, rah ṭha a chhuah ngei a beiseiawm.

Biometric attendance system hi kháwl hmanga pisa (office) kaite an kutzia (finger print) kaltlanga chhinchhiahna, thlen hun leh haw hunbi chhinchhiahna a ni. Khawl man a to lutuk loa sawi a nih avangin, bawhzuia hman nghal mai theih tur chi niin a lang.

Biometric attendance hi hman a nih chuan khawlin kutzia a chhinchhiah vek avangin attendance bua hming inziah kêp ang chi kha a theih tawh dawn lo a; pisa kai hun leh haw hun dar zat pawh a chhinchhiah vek avangin pisaa inthununna kenkawhna atan thil ṭha tak a ni ngei ang. Sorkar hnathawkte an thawhna hmunah an awm ṭhat lehzual a beiseiawm a, hnathawh hun a tam zawk thei tawh ang a, pisa dawrtute pawhin an hlâwkpui ngei a rinawm.

Khawl hmanga pisa kai dan chhinchhiah hi mi dik leh taimate tan chuan phurrit a ni dawn lo a, buai phahna tur a awm lo ang; mi thatchhia leh zelthel deuhte tan erawh chuan a hnawk viau mai thei.

Biometric attendance system hman hi thil ṭha, thil lawmawm a ni a, kan ram kal zel tur leh hmasawnna lamtluang zawhna tura thil ṭul tak pakhat a ni. Mi dik, mi taima, mi rinawmte chuan ṭha an tih ngei tur thil a nih a rinawm.