MSSSB ṭhiah hi a ṭha em?

Chief minister Lalduhoma chuan CM atana lak luh a nih nía press conference a neihah Mizoram Subordinate Service Selection Board (MSSSB) ṭhiah a nih tur thu a puang a, December 14-a Assembly session-ah MSSSB an ṭhiah dawn thu a sawi bawk.

CM chuan Assembly House-ah, MSSSB-in exam a buatsaih mek an zawh veleh an ṭhiah dawn thu te, MPSC rin ṭha an ti a, an hna a hautak zel chuan an thuam chak zel dawn thu te, political appoinment awm theihna remchang board din ṭha an tih loh thu te, MSSSB hna lakah fel lo a awm tih an hriat chian thute a sawi a ni.

Sorkar hian MSSSB ṭhat lohna leh chêt dan dik lo an hre chiang viau a ni mai thei a, chuvanga ṭhiah duh pawh a niin a rinawm. Chutih laiin, MSSSB exam hmachhawn tawh tam ber hi chuan a 'fair' thawkhatah an ngai niin a lang. Ṭhatna leh ṭhat lohna a nei theiin a rinawm a; a ṭha lo lai siamrem chung zelin a ṭhatna lai hmuh thiam ve pawh a ṭul awm e.

MPSC hi sorkar hnathawk group-A chin latu atan hman a ni ṭhin a, eng emaw chángin group-B gazetted lâktir a ni bawk ṭhin. Group-B pangngai leh a hnuai lam thawktu lakna chu MPSC kutah dah a ni ngai lo niin chinchang hre deuhte chuan an sawi.

Sorkar hnathawk tur lâkna, competitive exam awm chin zawng zawng MPSC kuta dah vek sên a nih a rinawm loh a, chutih rualin, hna latu bik commission/board kuta a awm erawh thil ṭha a ni. MPSC kuta awm lo, competitive exam buatsaih ngai tho site hi MSSSB ṭhiah a nih chuan departmental exam-in kalpui leh mai tur em ni ang?

Sorkar hnathawk tur dik leh felfai taka lak a nih theih nan te, a tling leh tlak ngeite an tlin theih nante MSSSB hi ṭhiah a nih pawhin, a aiawhtu, a thlakna tur din leh ni se, Mizoram tan, Mizo ṭhalaite tan leh state sorkar tan thil ṭha tak a nih a rinawm.