Winter Festival leh a nghawng

Tun hnai, chawlhkar liam ta mai khan Lammualah Winter Festival huaihawt a ni a, mipuiin an hlut hle niin a lang. Festival hmuna dawr hawn aṭangin ni tin 19,00,000 vel lak luh a nih thu te, festival chhunga sum lak luh zawng zawng Rs 1,00,00,000 tling tura chhût a nih thu leh, a buatsaihtu Tourism department pawhin Rs 10,00,000 vel an hmu thei tura chhût a nih thute tarlan a ni.

Heng aṭang hian Winter Festival hi a hlawhtling hle tih a lang. Chhimtu mipui an ṭhahnem a, zan lamah an tam zual. Mipui lam aṭanga cheng vaibelchhe chuang vir vel kha Mizoram chhungah a tàwp a, sum lama hlâwkna pawh Mizote'n an tél deuh vek niin a lang bawk. Thil lawmawm lam a ni a, kum dangah pawh tih zel chi tak a ni kan ti thei ang.

Winter Festival kaihhnawiha thil langsar ber pakhat chu traffic jam a ni. Festival avang hian zan lamah traffic jam a nasa tak zet a, chhun lama traffic jam ai pawhin a nasa zawk mah niin a lang. Mipui leh lirthei an tam hrim hrim vang a nih rualin, lirthei che vel enkawlna lama ruahmanna leh inbuatsaih lâwkna awm mumal loh vang a ni thei bawk.

Festival hlawhtling tak buatsaih a nih a, mi tam takin sum leh paia hlâwkna tam tak an chan lai leh, hlim leh nuam ti taka mi tam tak an chêt vel suau suau karah khan, mi tam takin harsatna an tawh phah ve bawk a ni tih hriat a ṭha a. Hmanhmawhthlak taka damdawi-in pan ngai, kal hlei thei si lote pawh an awm niin a lang.

Kan hlimna leh lawmnate hi mi dang tana harsatna thlen lo zawnga kalpui thiam a ngai a. Kum dangah Winter Festival an la ti leh zel dawn a nih chuan mi dang tana harsatna thlen lo zawnga buatsaih theih ni se, a kaihhnawih leh a nghawng theih thil chi hrang hrangte ngaihtuah chungah inruahman ni se, a ṭha hle ang.