Krismas leh a behbâwm

Mizote hian Krismas kan ur lâwk nasa ṭhin a, kan lâwm uar hle ṭhin bawk a; khawvelah Krismas lawm uar ber hnam zinga mi kan ni mai awm mang e aw, tih mai àwma mawi a ni.

Tun hma aṭanga tunlai thlengin nu leh pate'n an fate 'Krismas kawr mawi' leisak ngei an tum ṭhin a, khaw tin véng tinah Krismas lawmna ruai kan ṭheh mup mup ziah a, hmun ṭhenkhatah phei chuan an nawn ṭhin bawk.

Chu kan hunpui, kan nghahhlelh em em chu a hnai ta hle mai, ni li chauhin a dang ta. Hun lawmawm hmang turin Mizo mipui kan inbuatsaih mek a, Aizawl Bazarpui pawh a lun leh ta mep mep hle. Aizawl Bazarpui tâwt tak, mipui zi nuai nuai leh innâwk nûlh nûlh karah hian thil sual tih pawisalo, mi pawisa leh thil dang rûk tum an awm theih avangin mi tin kan fimkhur a ṭha.

Thingtlang aṭangin nu leh pate'n an fate hruaiin Krismas bazarah an rawn kal a, ṭhenkhat chu neinung tak tak an ni ang a, ṭhenkhat chu khawsak harsa tak chunga fate'n rual an awh lutuk hlaua neihthinglung kháwnga bazar tura kalte an ni ang a, a ṭhen phei chu pûk chawp hialte pawh an ni mai thei.

Heng karah hian dawrkaite thil phalna leh mite ṭanpui duhna rilru nen thil man tito lutuk lo turin insiamrem thei se la a duhawm hle. Hnam dangte chuan an hunpuiah thil an titlawm hlauh ṭhin. Mizo dawrkaite pawhin Krismas bazar hi thil tihto sauhna hun atan hmang mai loin, mirethei zawkte tan malsawmna ni turin titlâwm hlauh zawk thei se a va ṭha dawn em.