Krismas vuakvêt leh lirtheia himna

Krismas leh kumthar thleng tur mipuiin rálmuang tak, him leh hlim taka an hman theih nan Excise & Narcotics Department chuan special drive an kalpui mek. Khualzin phur lirthei – bus, taxi, maxicab leh a dangte khalhtute chu zu leh ruih theih thil dang an tih leh tih loh leh, an ruih leh ruih loh an endik ṭhin a, ruihhlo tam tham tak an man tawha sawi a ni. Zu, ruihhlo leh a kaihhnawihah inhnamhnawih lo turin mipui an ngen bawk.

Excise depart-ment hmalakna hi thil ṭha a ni a, mipui himna atan thil ṭangkai tak a nih a rinawm. Lirtheia chêtsualna zinga tam tak hi chu a khalhtu ruih vang niin a lang a; rûi chung leh zu nam chunga lirthei an khalh leh khalh loh Excise enforcement-te'n an endik ṭhin hi a lawmawm hle a, chhunzawm zel thei se a duhawm hle.

Hunpui a hnaih hian rilru phâwklêk a awl ṭhin a, lirthei khalhtute an fimkhur zual a ngai. Hmanhmawh lutuk vangin fimkhurna hloh palh theih a ni a, invên a ngai. Rûi chung phei chuan lirthei an khalh tur a ni lo. Ruih avangin lirthei khalh danah harsatna tâwk lo mah se, ruih vang hrim hrimin mi dang awm tinuam lotu, harsatna thlentu nih theih a ni.

Tunlaiin Aizawlah hmun dang aṭangin Krismas châkkhai lam an tam a, an khaw lama an haw leh lamah chuan bungrua an ngah tlangpui tawh a, khualzin phur lirtheite pawh an báwr ṭhin hle. Bus/maxicab chungah bungrua sang tak taka chherchhuan a ngai ṭhin a; hemi chungchangah pawh hian chintâwk neih thiam leh fimkhur a ṭul àwm e.

Khualzin phur lirthei khalhtute hi mi tam tak nunna kawltu an ni a, an kutah mi tam tak nunna leh thihna a innghat ve tlat mai a; hei hi lirthei khalhtute'n an hriat chian a ngai a, an rilruah an vawn reng a ngai. 'Ka passenger-te him taka an tum hmun thlenpui hi ka mawh a ni' tih hi lirthei khalhtute cháng-vawn ni reng thei se.