No Vehicle Zone kaihhruaina zawm

Vawiin December 22 hian Aizawl khawpuiah lirthei tlân phal lohna hun leh hmun – No Vehicle Zone kalpui a ni dawn a, naktuk December 23 bakah, ni 29 leh 30-ahte pawh kalpui leh a ni ang.

Krismas dawn hnai, Aizawl bazarpuia mipui tam vanglaia No Vehicle Zone kalpui ṭhin hi kum 2009 khan ṭan a ni a, zawngchhang tlak tak a ni chêk a ni ang, a hnu lamah pawh tih zui a ni ta zel. Krismas dawn hnaiah Aizawl bazarpui báwr velah mihring an tam a, lirthei chhuak a tam a; lirthei mai bakah mihring an tâwt ṭhin hle. Lirtheia intihpalh a hlauhthawnawm em em ṭhin bawk.

Lirthei tihbuai loha bazarpuia mipui chêt vêlna hun remchang siam a ni hi a lawmawm a, mipui náwlpui pawhin ṭha an ti a, nuam an ti tlang niin a hriat. Chuvangin, sorkarin kuminah No Vehicle Zone a kalpui leh dawn ta pawh hi a lawmawm hle kan ti thei ang.

No Vehicle Zone chhunga lirthei chêt vel dan tur thuneitute'n an duante mipuiin zâwm tlang ila, chu chu lirthei khalhtute leh mipui nâwlpui remchanna leh nawmna tur a ni ang. Zâwm ṭha duh lo an awm hian mahni leh mi dang tihbuaina leh harsatna thlenna a ni a, sorkar thupek zawm lohna a ni bawk. Sorkar thuneitu lamin chêt vel dan tura ruahmanna leh kaihhruaina an siamte hi i zâwm tlâng ang u.

Kê kalte pawhin mi dang ngaihchan thiam a ṭha a, mi aia uchuak bik nih tum lo tlang ila. Lansarh duh vang te, mi ngaihven bik nih duh vangte leh chhan dan vangte pawh a nih ang, mi aia uchuak deuha chê leh thil ti an awm fo. Mi aia uchuaka awm leh chêt hi ze ṭha a ni lo a, Mizo zia a ni lo bawk a; chuvangin, mi mitmei vên thiam a ṭha hle ang.