Krismas hriat reng tlâk i hmang ang u

Krismas kan hnaih ta hle a, Vanglaini chanchinbu pawh vawiin hi kumin 2023-a a chhuah hun hnuhnung ber a lo ni ta reng mai. Kumtluana chawlh mumal pawh nei hlei thei lo chunga harsatna lian awm loa tun hun min hruai thlengtu Pathian hruaina a ropui hle.

Media-te hi mi chanchin ziaka chhuah ṭhin kan ni a, mi ṭhenkhat tana thu lawmawm te, ṭhenkhat tana thu lawmawm loh leh mualpho theihnate chhuah loh theih loh a ni. Kuminah pawh mi rilru leh thinlung na ngawih ngawiha siam kan nei mai thei a, tih dik loh palhte pawh kan nei. Heng zawng zawngah hian mipui hriatthiam kan ngai hle. Kan phû loa min faktute leh min fuihtute erawh an hlu tak zet.

Mizote'n hunpui kan ngaih hlut ber hi mi ṭhenkhat chuan nun kawng sual zawh ṭanna hun atan te, nun pum pui a ṭha lo zawnga her danglamtu leh, nakin zela inchhìrna tur thil tihna hun atante an lo hmang tawh ṭhin. Chuvangin, fimkhur ila, a hnu lama kan inchhîrna tur thil kan tih loh nan rilru fîm tak nen i hmang ang u.

Krismas hi a neitu, chhandamtu Isua Krista duh danin hman tum ṭheuh ila, mahni chhungkua leh khawtlangah harsatna leh buaina thlentu ni loin, remna leh malsawmna thlentu ni tum ṭheuh ila, a ṭha lam hawi Krismas hriat reng tlak hman i tum ang u.

Vanglaini chhiartu zawng zawngte Krismas leh kumthar hlim leh lawm taka an hman ṭheuh kan duhsak a, mahni hmun ṭheuhah mi dangte duhsakna leh hriatthiamna rilru pu chunga hunpui thleng mek hi hmang a, lawm turin duhsakna chibai ṭha ber kan hlàn e.