Krismas lawmna ruaipui

December 26 hi Krismas lawmna ruai theh ní a ni a, Mizorama kohhran tam ber chuan ruai an theh dawn. Kohhran eng emaw zatin Krismas ní, December 25 khan ruai an lo theh tawk bawk.

Krismas hi Mizo Kristiante hunpui ber a ni a, kum za chuang liam taa Mizorama lawm tan a nih atangin uar thei ang bera lawm a ni thin a, kohhran zawng zawng deuh thawin ruai an theh thin a, tun thlengim kan la chhunzawm ta zel a ni.

Krismas leh kumthar lawmna atana khawtlang huap ruai theh hi a hautak hle mai a. Kohhran mipuiin sum tam tak an thawh khawm thin a, chaw vawi khat ei atana sum an thawh zat hi in lama senso aiin a sáng zawk deuh vekin a rinawm. Sum mai bakah, thâ a heh hle bawk a, mipuiin ruai an theh theihna tur hian mi tam takin hah takin an thawk thin. Vawi khat chaw eina atana ruai buatsaihin sum leh thâ a heh dante leh a buaithlak dante ngaihtuah chuan a inman lo, a inhen lo, a manhla lo, ti pawhin ngaihtuah ve theih tak a ni.

Hetih rual hian, a thatna leh a hlâwknate kan hmuh thiam ve erawh a ngai ang. Khawtlang huap ruaipui buatsaih hi hautak hle mah se, khawtlang leh kohhran mipui min tipumkhattu a ni a, chu chu suma lei mai theih loh, hlu tak mai chu a ni. Krismas leh kumthar ruaiahte chuan kohhran leh khawtlang thil tiha lang tam lo mi tam tak an rawn inlár a, ruai an theh thin a, chu chu a hlu lai pakhat a ni bawk.