Tum neih leh tihhlawhtlin

Kum thar 2024 kan chuang kai a, Pathianni kaihhruaina changin Vanglaini pawh kan chhuah leh ṭan ta a, a lawmawm hle. Chhiartu zawng zawngte kum thar chibai kan bûk che u a, Vanglaini latu (subscriber)- te tan kumin 2024 hi kum ṭha, malsawmna tam tak in dawn kum a nih theih nan duhsakna kan hlân e.

Kum a thar hian rilru a thar deuh sûrh hian a hriat a, mihringte hi kan phûr thar sawt pawh a ni mai thei. Phûr hi a ṭha a, hmasawn zel tur leh mawhphurhnate hlen tur chuan phûrna a ngai a, phûrna tel lo chuan hmasawn a har ṭhin. Kum thar tìr lama kan phûrna ang hi kumtluana neih reng a harsa a ni mai thei a, chuti chung chuan, kan hna, kan tih tur leh kan mawhphurhnaahte intihphûr hram hram zel leh infuih ṭhin a ṭha.

Kum a thar dawn hnaiah emaw, kum thar tirah emaw, kum khat chhunga thil tih tum, thlen tum leh tihhlawhtlin tumte mi tam takin an nei ṭhin. Duhthusam leh beisei ang taka tihhlawhtlin a nih loh pawhin, tih tum bik neih leh tihhlawhtlin tum bik neih hi mihring nuna thil pawimawh tak a ni. Tum mumal nei lo leh thlen tum bik nei lo tan hmasawn a har fo. Mizoram mipui hian tum mumal, thlen tum chin leh tihhlawhtlin tum bikte nei ila, mahni leh chhungkaw tan thil ṭha tak a ni ngei ang.

Mizoram sorkar (ministry) pawh ding thar a ni a, chawlhkar thum vel âwrh chauha upa a la ni a, an sorkar tawh chunga ni eng emaw zat chu Krismas leh kum thar chawlh a ni nghe nghe. Sorkar thar a nih angin h o t u t e p a w h a n phûr viauin a hriat a, minister ṭhenkhat chuan kar thum lek chhungin hmalakna pawh an nei ṭha hman a, mipui fak pawh an hlawh rih viauin a hriat.

Heng phûrnate leh hmalakna ṭhate hian hun tìr lam chauh daih lo se, kum 5 chhung sorkar siam tur an nih angin, an sorkar chhung zawng daih se, an thil tumte tihlawhtling ngei turin zuai mai loin theihtawp chhuah zel se; tih hi ram mipuite duh dan a nih a rinawm.