Khapna kara halpuah hal kha

December 31, 2023 zanah Aizawlah hàlpuah hàl a nasatzia kan hre tlang. Boruak tehnaah 2022 kum hlui thlah zan aiin kum 2023-ah a lêtin boruak a bawlhhlawh zawk a, kum hmasate aiin hâlpuah hàl a nasa zawkin a lang.

Halpuah khap a ni chunga khati taka nasaa hàl a ni leh, hmun tam takah a hâltu pawh hmuh theih a nih laia man an awm miah lo kha a mak a; police-in an tih tur an ti tâwk lo ti pawhin a sawi theih ang. Chutih rualin, thil awlái lo tak a nih a rinawm a, mipui rilru sûkthlêk deh a ngai ve bawkin a rinawm. Man tumna tak tak an nei lo a ni thei bawk.

Kum tin deuh thaw Krismas leh kum thar vuakvêtah sorkarin hàlpuah leh a kaihhnawih thilte a khap ṭhin a, mahse, kum hlui thlah zanah erawh hàlpuah hàl a nasa viau zel tho.

Mi náwlpui hi chuan hâlpuah hâl tum lo mah se, miin an hâl chu pawi an ti lêm lo niin a hriat; hàlpuah hàl lawmna au thâwm a ṭha ṭhin tlat. Kum hlui leh kum thar inthlâkah mipuiin eng emaw tak an beisei a, chu an beisei chu hàlpuah hàl hian a phuhrute pawh a ni mai thei.

Hun kal tawh thlirin, hàlpuah hâl lo tura hmalaknaah hian khap ringawt ni loin, inzirtirna ṭha neih a ṭul a, mihring rilru hmin hmasak a ngai. Kum sawm chuang hret kal taah khan media-te'n hàlpuah ṭhat lohzia an puangzar tak tak a, sorkarin a khap vang ni loin kum hlui thlah zan zanlaiah Aizawl khawpui a reh duk thei tlat.

Khati taka hàlpuah hàl a nasa kha Mizo mipuiin dan leh thupek kan pawisak lohzia tilangtu a ni ve bawk a; hriselna kan ngaih pawimawh tâwk lohzia leh mi dang kan vènthàwn lohzia tilangtu a ni tel bawk. Mipui náwlpui hi inenfiah a ngai ve bawk ang.