Zu khapna rama zu man tam thu

Excise & Narcotics department chuan kum 2023 chhung khan zu chi hrang hrang litre 94,609 leh úm 33,680 an man a; zu bilh lai ṭín 2,03,623, beer ûm/bûr 48,862 leh Myanmar zu litre 640 an man bawk.

Mizoram hi zu khapna ram a ni a, The Mizoram Liquor (Prohibition) Act, 2019 hmangin zu khap mek a ni. Zu khapna ram zím têa kum khat chhunga zu litre 94,609 leh úm 33,680 man tur a awm hi thil mak a nihna lai a awm rualin, a mak lohna lai a awm thei bawk àwm e.

MLTP Act, 1995 hmangin zu khap a lo ni tawh a, March 2015-ah MLTP Act hlih niin, khuahkhirhna hnuaiah zu zawrh phal a ni. Mahse, kum 2019 aṭangin zu khap a ni leh ta a. Zu khap leh khap lohah tawnhriat kan nei ve ve tawh a, chu'ng aṭang chuan mipui náwlpui leh ram tana ṭha tur uluk taka ngaihtuahin hmalak a ṭhain a rinawm.

Zu khap a nih avangin kan ramah zu a rêm vek thei ngai dawn lo a, a rêm vek loh avangin zu khapna chu a hlawhchham vek tihna a ni kher lo. Zu kan khap zel dawn a nih chuan, tute emaw hlauh vang leh lan mawina atan mai ni lo se, Mizoram aṭangin tirêm vek thei lo mai ila, zu khapna tun aia a hlawhtlin lehzual theih nan dan lenkawhnaah khawng lehzual a ṭul ang a, thawktute pawh tam zawk dah a ṭul ang.

Zu khap leh khap lohah mipui ngaihdan a inrual thei ngai dawn lo a, a ṭhatna leh ṭhat lohna a awm ve ve. Zu zawrh emaw, khap emaw hi a ṭhatna leh ṭhat lohna te, a nghawng zawng zawngte uluk leh chîk zawka zirchianna a ṭhain a rinawm a; zirchiannaa hmuh chhuah milin, ram leh mipui náwlpui tana ṭha ber tura kal dan kawng zawn chhoh ni se a ṭha ang.