Bawlhhlawh paihtute manganna

Aizawl khawpuia bawlhhlawh phur lirthei neitute chuan nikum October thla aṭangin bawlhhlawh paih man pek an nih tawh loh avangin bawlhhlawh paih zawm theih loh mai an hlau tih an puang a; bill an lak theih loh zel chuan bawlhlawh paih tawh rih loh mai an tum nia sawi a awm bawk.

An sawi danin, Aizawlah hian lirthei 100 chuangin ni tin bawlhhlawh an paih ṭhin a, bawlhhlawh paih man chu AMC-in 60% a tum a, local council-te'n 40% an tum thung.

Aizawlah ni tin lirthei 100 chuang paih khawp bawlhhlawh a awm hi a tam tham viau mai. Khawpui a lian ve tawh a, chhungkua leh mihring kan tam ve viau tawh vang a nih a rinawm. Chutihrualin, khawpui phû loin bawlhhlawh kan ngah ve hrim hrim pawh a ni thei. Engpawhnise, mihring khawsak sang zel leh changkâng zelah mipui hian bawlhhlawh nei tlem tial tial zawnga khawsak kan tum a ngai a, chu chu kan hmasawnna tur pakhat a nih a rinawm.

Bawlhhlawh paihtute'n an paih man an dawn loh chhan hi a taka luhchilhtu tan lo chuan hriat mai a har – chhan eng emaw tak chu a awm ang. Harsatna lian tak, pumpelh theih loh a awm vang a ni thei a, chutiang a nih chuan lirthei neitute pawhin harsatna an hriatthiampui a, an inpawh fàn ve a ngai àwm e.

Chutih rualin, sum inpek loh chhan hi AMC aṭangin emaw, state sorkar aṭangin a ni emaw, chinfel mai theih a lo ni mai thei a, khawilaiah emaw sum hrên khawtlai vang a lo ni reng thei bawk. Chutiang a nih chuan, bawlhhlawh paihtute harsatna tawh chungchangah hian harsatna leh buaina lian zawk a thlen loh nan chinfel thuai ni se; a mutàn lai tak chingfel tura hmalak thuai thuai a ṭul a ni.