Mi dang hnena Lengpui Airport hlan

Chief minister Lalduhoma chuan Lengpui Airport chu Airport Authority of India (AAI) emaw, Adani Group emaw hnenah a rang thei ang bera hlan chhâwn an duh thu a sawi.

AAI hnena Lengpui Airport hlan chungchang hi tun hmain sawi a lo awm tawh ṭhin a, mahse, tun thlengin hlan a la ni lo. Sorkar hotute'n mipui dem an hlauh avangin ṭha zawka an ngaih pawh an titlang ngam lo ṭhin a ni mai thei.

Mizoram University din a nih dawn khan mi tam tak chuan state university ni turin an duh a, mahse, central university a ni ta zawk a, a lo fuhzia kan tawng chho mawlh mawlh mai. Tunah chuan a chhuanawm ta hle a, India rama university vantlang chunglam a ni ta. Hetiang a nih theih chhana pawimawh tak pakhat chu central university a nihna hi a ni.

Chinchâng hre zawkte sawi danin, Lengpui Airport pawh hi AAI emaw, Adani Group emaw hnena hlan hi thil ṭha zawk tur, airport ṭha leh changtlung zawk, mawi zawk kan neih theihna tur a nih a rinawm. India ramah Mizoram hi state rethei ber pawl a ni a, state hausa zawkte pawhin state sorkar enkawl airport an neih meuh loh lai a, state rethei ber pawlin enkawl hautak lutuk airport lo neih tlat hi thil ṭha ber a ni lo ang.

Lengpui Airport hi tunah chuan thlawhtheihna ṭum leh thlawh chhuah theih nan kan enkawl ve hrâm hrâm a ni ber a, tichangtlunga tihmasawn tak tak turin state sorkar sumin a tlin lo. Airport kan neih chhun hi tun aia mawi zawk leh changtlung zawk ni se kan duh a nih chuan, mi dang hnena hlan hi thil tih àwm tak a ni.

Chutih rualin, fimkhur erawh a ngai hlein a rinawm; nakin zela Mizoram sorkar leh mipui inchhîrna tur thil a awm loh nan uluk taka ngaihtuahna sên a, fimkhur taka hmalak a ngai ngei ang.