Sorkar thupek leh retailer-te

Food, Civil Supplies & Consumer Affairs department Director chuan tun hnaiah office order tichhuakin, FCSCA department hnuaia fair price shop dealer/retailer-te chu thla tluana an dàwr (kudam) hawng ngei turin a hriattir.

FCSCA Director-in a tarlan dan chuan, retailer-te'n Pathianni tih loh ni dang zawngah chuan ni tin zingah dar 6:30-8:30 inkar leh tlaiah dar 3:30-5:30 inkarah dàwr/kudam an hawng ngei tur a ni. Hei hi mipuite'n sum leh paia harsatna an tawh pawha thla khat chhunga an chanpual (quota) an lâk theihna tura tih a ni.

Supply department hnuaia fair price shop retailer-te'n an dàwr/kudam hawn chin tur bituk awm loin, thla tluanin an hawng tur a ni tih hi tun hma aṭanga thu awm sa reng a ni a, department lam pawhin hriattirna a lo chhuah tawh ṭhin. Mahse, sorkar thuchhuak chu khua leh veng hrang hranga retailer-te'n an zâwm ṭha lo ṭhin; an zâwm ṭha lo ṭhin tih hretu chu mipui an ni. Tunah hriattirna tihchhuah nawn a ngai leh ta.

Sorkar thuchhuak FCSCA hnuaia retailer-te'n an zâwm ṭha duh lo ṭhin hi a pawi hle a, retailer atana hmangtu sorkar ngaih pawimawh lohna a ni a, sorkar an hlauh lohzia tilangtu pawh a ni ang. Sorkar thupek an zawm loh pawhin sorkarin a hrem ngai chuang lo a, chuvang chuan sorkar thupek angin an awm duh lêm lo a ni thei bawk. A tuartu chu mipui an ni.

Fair price shop dealer/retailer-te hian sorkar thuchhuak hi an ngai pawimawh tur a ni a, an zâwm ngei tur a ni a; an zawm leh zawm loh pawh thuneitu sang zawkte'n an vil zui ang a, an bawhzui a ngai. Thupek an zâwm duh lo lui zel a nih phei chuan hrem ngam pawh a ṭha ang a; chu chu mipui náwlpui tana hamṭhatna tur zawk a ni ang.