Ngaihven hlawh lo Assembly session?

Mizoram Legislative Assembly pasarihna session vawi riatna chu tluang taka zawh a ni ta. Kum 2016-2017 chhunga Mizoram budget tura ruahman cheng vbc. 8038.39 pharh a ni a, hei hi kum hmasa aiin cheng vbc. 461.82-in a tam zawk.

Mizoram rorelna sang ber ṭhutkhawm hi mipui nawlpui tan luh ve theih ni lo mah se, TV kal tlangin live-a pek chhuah a ni. Tunlaiah chuan Mizoram kil ber
aṭang pawhin Assem-bly session hi live-a thlir theih a ni tawh a, a duh leh tui mi tan chuan an thurel zawng zawng hi hriat vek theih a ni; langtlang takin thil kalpui a ni.

Hetihlai hian kan state budget session hian mipui nawlpuiah ngaihven a hlawh tawk lo a ang a, an thu relte pawhin sawi a hlawk vak lo a, thil thar tihchhuah leh thil dik lo hai chhuah leh sawi chhuah pawh a tam lo hle. Sorkar hi a ṭhat em avangin sawisel tur a awm lo lam niin a lang lo a, a chhiat em avangin kan sawisel peih tawh lo pawh a ni hek lo ang; kan MLA-te hian an tih tur an ti tawk lo a ni zawk ang em?

Mizoramah hian opposition MLA hi paruk chiah an awm a, hei vang hian Assembly House rorelte hi a ngaihnawm phak lo a nih chuan, eptu MLA lamin an tih tur an ti tawk lo a ni thei ang. Sorkar khalhngiltu tur ber an ni a, an thusawi a zavaiin mipuiin TV kal tlangin an thlir thei bawk a, ram chhung ti ti ni zui thei tur sawi chhuahna remchang a ni a, tuna an kal danah hi chuan mipui beisei an phak lo deuh mai thei?

Roreltu party lam pawhin Assembly House hi hmang ṭangkaiin, mipui hnenah ram an kaihhruai dan an puanna remchang tak a ni a, an thil tih tawh sawi chhuahna hmun leh an kal zel dan tur an puan theihna ṭha tak a ni a; amaherawhchu mipui nawlpui tana sawi zui tur leh han chai deuh tur thil sawi chhuah a ni ngai meuh loin a lang.

Lok Sabha leh Rajya Sabha rorelte anga chân tur ni hauh lo mah se, kan state rorelna in kalphung hi a tluang purh purh lutuk a; sorkarna chelhtu leh eptu MLA-te hi rorelna sanga an ṭhut dawn hian an inbuatsaih ṭha tawk lo niin a lang a, tuna kan kalpui danah hi chuan kan Assembly House rorelna hi mipuiin an ngaihven tawk lo a ang hle.