Jail-a táng tlân bo chungchang

Kum 2015-2023, kum kua chhungin Mizoramah jail-a táng tlân bo mi 68 an awm a, chu'ng zinga mi 28 chu tun thlengin man an la ni lo. Siaha Jail aṭang ringawtin mi 21 leh Central Jail aṭangin mi 17 an tlân bo a ni. Mi 68 zinga 25 chu nikum 2023-a tlân chhuak an ni a, kum 2022-ah mi 18 an tlân chhuak bawk. Tun hnai kum hnih chhungin mi 43 an tlân bo a, kum kua chhunga tlân chhuak zat aṭangin 63.23% a tling.

India ram leh ram dang ang bawkin Mizoramah jail-a táng tlân bo an lo awm tawh ṭhin. Tun hnai kum hnih lek chhungin tlân bo an tam zual a, mi 43 lai an tlân chhuak hi ngaihtuah chian a ngai. Mizoram mualphona a ni thei a; sorkar thuneitu, mawhphurhna changtute bik tan pawh mualphona tling a nih avangin awmze neia hmalak a ngai ang.

Jail aṭanga tlan bote tlân chhuah dan hi en chian a ṭulin a rinawm a, tlân chhuak an awm tawh loh nan sorkarin ṭan a lak lehzual a ngai àwm e. Mizorama jail-te dinhmun en chian a ṭulin a rinawm a, ṭhenkhat chu thawm ṭhat ṭul tak takte pawh a ni ang.

Kan jail-te hi táng tlân bo duh tana harsa lo taka tlân chhuah mai theihna khawpa awngrawpte a lo ni palh thei. Chuvangin, sorkar leh thuneitute hian jail-te hi enfiahin, thawm ṭhat leh tihhmasawn a ṭulna ang angah thawm ṭha se a duhawm hle.

Kum kua chhunga jail táng tlân chhuakte zingah tun thlenga la man loh mi 28 an awm a, tlân chhuak zat aṭangin 41.18% a ni a, a tam hle. An tlân chhuah tirh lamah a ri hluai a, police lam pawhin an zawng ngawrhin a hriat. Hun a kal a, kumte a vei tawh chuan police leh mipui hian kan ngaihven tawh lo a, man tumna tak tak a awm tawh lo a ni thei em? Ṭhenkhat chu ram dangah an bibo tawh a ni thei a; chuti chung chuan, táng tlân bo man leh chungchangah hian ṭan lâk thar a ngai niin a lang.